Google DeepMind ka prezantuar modelin e inteligjencës artificiale AlphaEarth Foundations, i aftë të krijojë harta shumë të detajuara të Tokës pothuajse në kohë reale, për të ndihmuar shkencëtarët të kuptojnë ndryshimet mjedisore. Ky sistem funksionon si një “satelit virtual” që mund të hartojë çdo vend dhe kohë, duke kombinuar triliona imazhe nga dhjetëra burime publike: satelitë, radarë, skanime 3D me lazer dhe simulime klimatike.
Ai mbulon të gjithë sipërfaqen tokësore dhe ujërat bregdetare, me saktësi deri në zona prej 10 metrash katrorë, dhe përdor më pak hapësirë ruajtjeje se modelet e ngjashme, duke e bërë analizën në shkallë të gjerë më praktike.
Gjatë testimeve (2017–2024), AlphaEarth Foundations e kaloi mesatarisht me 24% saktësinë e modeleve të tjera në identifikimin e përdorimit të tokës dhe vlerësimin e karakteristikave të sipërfaqes. Modeli tashmë po përdoret nga mbi 50 organizata globale për monitorim ekosistemi dhe planifikim urban. Një shembull është iniciativa braziliane MapBiomas, e cila po e përdor për të studiuar ndryshimet bujqësore dhe mjedisore në Amazonë, duke krijuar harta më të sakta e më të shpejta se kurrë më parë.
Ky zhvillim është pjesë e një trendi të ri ku AI shndërron vëzhgimet e vazhdueshme satelitore në mjete praktike për shkencën mjedisore. Të dhënat e sakta dhe të përditësuara ndihmojnë në matjen e efekteve të ndryshimeve klimatike, planifikimin e ruajtjes së natyrës dhe menaxhimin e burimeve si uji dhe toka bujqësore. Shembuj të ngjashëm përfshijnë projektin e NASA-s dhe Universitetit të Kopenhagenit në 2020, ku u hartuan 1.8 miliardë pemë në Sahel e Sahara me AI, si dhe satelitin SËOT të NASA-s (2022) dhe misionin EarthCARE të ESA-s (2024).
Google po shpërndan të dhënat e AlphaEarth Foundations përmes Google Earth Engine, për të nxitur kërkime të mëtejshme dhe për të mbështetur monitorimin global të mjedisit.
