Sistemi i paralajmërimit të tërmeteve i Google nuk arriti të lajmëronte shumë qytetarë të Turqisë përpara lëkundjeve vdekjeprurëse të shkurtit, siç zbuluon një hetim i BBC Neësnight.
Google thotë se sistemi i tij i alarmit mund të paralajmërojë përdoruesit në telefonat e tyre deri në 1 minutë përpara se të godasë një tërmet. Kompania tregon se alarmi iu dërgua miliona njerëzve përpara tërmetit të parë, më të madh. Megjithatë, BBC vizitoi tre qytete në zonën e tërmetit, duke folur me qindra njerëz dhe nuk gjeti askënd që kishte marrë një paralajmërim.
Sistemi funksionon në telefonat Android, në thelb çdo telefon që nuk është iPhone. Telefonat Android, të cilët shpesh janë më të përballueshëm, përbëjnë rreth 80% të telefonave në Turqi.
“Nëse Google bën një premtim, ose bën një premtim të nënkuptuar, për të ofruar një shërbim si paralajmërimi i hershëm i tërmetit, atëherë për mua, ai rrit rrezikun“, thotë Prof Harold Tobin, drejtor i Rrjetit Sizmik Veriperëndimor të Paqësorit. “Ata kanë një përgjegjësi të jenë në gjendje të ndjekin diçka që lidhet drejtpërdrejt me jetën e njerëzve.”
Nga ana tjetër drejtuesi i produkteve të Google, Micah Berman, këmbënguli se sistemi i paralajmërimit kishte funksionuar. “Ne kemi besim se ky sistem ka ndezur dhe ka dërguar alarme,” tha ai për BBC. Megjithatë, kompania nuk dha prova që këto sinjalizime ishin pranuar gjerësisht. Më shumë se 50,000 njerëz vdiqën në tërmetin e shkurtit.
Mënyra se si ky shërbim funksionon është duke përdorur rrjetin e gjerë të telefonave të Android. Telefonat inteligjentë përmbajnë sensorë që mund të dallojnë dridhjet. Kur shumë telefona dridhen në të njëjtën kohë, Google mund të përcaktojë me saktësi epiqendrën dhe të vlerësojë fuqinë e një tërmeti. Google ka bërë një shpjegim se si funksionon. Kur zbulohet një tërmet me magnitudë 4.5 ose më i madh, sistemi Android mund të dërgojë një paralajmërim.
