Google ka prezantuar një funksion të ri të fuqishëm në asistentin e saj inteligjent Gemini, vetëm pak kohë pas ngjarjes I/O 2025. Ky përditësim i lejon përdoruesit që përmes Gemini të shikojnë dhe përmbledhin videot në Google Drive, duke shmangur takimet e panevojshme dhe duke përfituar informacionin e rëndësishëm në mënyrë të shpejtë. Përdoruesit mund të kërkojnë një përmbledhje të thjeshtë, pikat kryesore ose detyra konkrete, si dhe të bëjnë pyetje të personalizuara mbi përmbajtjen e videos.
Ky zhvillim pason një përditësim të mëparshëm të quajtur “Feature Drop” në Google Workspace, i cili solli veçori të tilla si sugjerimi automatik i hapave të ardhshëm në Google Meet, zëra të krijuar me AI për videot dhe zgjerim të funksionit “Translate for me” në Google Chat.
Google thekson se videot përmbajnë informacion të vlefshëm, por ndonjëherë është i pamundur shikimi i të gjithë materialeve. Me këtë veçori të Gemini, informacioni mund të merret shumë më shpejt pa pasur nevojë të shihet i gjithë materiali. Gemini tashmë analizon edhe skedarë të tjerë si PDF, dokumente teksti, Word, Google Docs dhe PowerPoint.
Për të përdorur këtë funksion, përdoruesit duhet të hyjnë nëpërmjet Google Drive, jo përmes aplikacionit të Gemini apo asistentit në telefon. Duke klikuar dy herë mbi një video dhe më pas mbi “Ask Gemini” (ikona me yll) në këndin e sipërm djathtas, përdoruesit mund të marrin informacione nga videoja.
Aktualisht, funksioni është i disponueshëm vetëm për klientët e Google Workspace me plane biznesi ose enterprise, ata me Gemini Education dhe Google One AI Premium. Më vonë pritet të zgjerohet për më shumë përdorues.
