Geely ka prezantuar një bateri të re litium-hekur-fosfat për automjetet elektrike, e cila sipas kompanisë do të jetë funksionale dhe pas 1 milion kilometrash distancë të përshkuara nga makina ose deri në 50 vjet.
Përveç këtij përmirësimi, bateria e re karikohet më shpejt, funksionon më mirë në mjedise të ftohta dhe mund t’i rezistojë disa abuzimeve serioze. Ajo përmban një diafragmë të përmirësuar për të rritur densitetin dhe sigurinë e energjisë. Bateria përdor një kombinim elementësh si elektroda për të reduktuar ndjeshëm shkallën e reaksionit të brendshëm kimik, gjë që kompania pretendon se është një nga arsyet kryesore që lloji i ri i baterisë mund të ofrojë një jetëgjatësi të tillë.
Prodhuesi kinez i automjeteve thotë se bateria mund të karikohet 3500 herë plotësisht, të gjitha me “ndikim minimal në autonominë e baterisë“. Kjo gjë jo vetëm që do të rrisë vlerën e makinave elektrike të përdorura, por Geely thotë se do të reduktojë emëtimet e karbonit me më shumë se 80,000 ton në vit.
Qeliza ka një kapacitet prej 192 Wh/kg dhe është afërsisht 40% më e shkurtër se një bateri tradicionale. Përveç kësaj, kapaciteti i baterisë tradicionale ra në 78.96% në -30°C ndërsa bateria e shkurtër mbajti 90.54% të kapacitetit të tij në të njëjtat kushte.
Geely krenohet gjithashtu dhe me sigurinë e baterisë. Nëse qeliza është shpuar, një shtresë alumini do të bashkohet automatikisht në diafragmën e baterisë për të krijuar një shtresë izoluese, duke parandaluar qarqet e shkurtra. Gjatë testimit, bateria u shpua nga tetë gjilpëra çeliku 5 mm njëkohësisht dhe u la të qëndrojë për 1 orë “me zero efekte të dëmshme“.
Geely gjithashtu qëlloi baterinë me një plumb 5.8 mm dhe bateria nuk mori flakë. Testimi nuk u ndal me kaq. Bateria e re u zhyt gjithashtu në ujin e detit, u hodh në zjarr, u vendos në mjedise jashtëzakonisht të ftohta, u godit nga ana, u shtyp me 26 tonë dhe u gërvisht, që të gjitha me rezultate mjaft të kënaqshme.
Kompania megjithatë nuk ka thënë se kur do të fillojë të prodhojë EV me këto bateri të reja.
