The Wall Street Journal ka raportuar se Elon Musk ka krijuar një kompani të re të quajtur X.AI, e cila do të fokusohet në zhvillimin e një sistemi të inteligjencës artificiale. Regjistrimi i kësaj kompanie nga ana e Musk duket se është bërë që në datën 9 mars të këtij viti.
Raportimet se Musk po themelonte një kompani të re AI po qarkullonin prej disa ditësh, pasi Business Insider zbuloi se Musk kishte blerë me mijëra GPU, të cilat do të përdoren për të fuqizuar sistemin e ri AI. Sigurisht ai shfrytëzoi mundësinë dhe raportohet se i ka kërkuar investitorëve në SpaceX dhe Tesla që të mbështesin projektin e tij të ri.
Gjatë një interviste në Twitter Space, Musk u pyet në lidhje me blerjen e sasisë së madhe të GPU, megjithatë miliarderi nuk i përmendi aspak planet që kishte për të krijuar një kompani AI. Ai thjesht tha “tashmë kanë nisur të gjithë të blejnë GPU, ndoshta dhe qentë”.
Emri X.AI i kompanisë përshtatet me X Corp., emër që ia ka caktuar tashmë Twitter-it, ndërkohë që emërtimi “X” shërben për të përfaqësuar vizionin e “aplikacionit të gjithçkasë”.
Musk ka kundërshtuar hapur OpenAI, një organizatë të cilën e bashkë-themeloi me investitorë të tjerë në 2015 por që u largua më pas në 2018. Pak javë më parë ai firmosi dhe një letër të hapur ku bënte thirrje që të gjitha eksperimentet gjigande me AI të ndaloheshin për një periudhë të caktuar kohe.
Me sa duket kjo thirrje nuk vlen për kompaninë që Elon Musk ka themeluar.
