Elon Musk e mbajti fjalën dhe tashmë më në fund kemi pamjet e para të progresit të BMI (brain machine interface) Neuralink.
Eventi u mbajt ditën e djeshme në një livestream në YouTube dhe kontenti ishte fare i thjeshtë, nëpërmjet eksperimentimit tek derrat u tregua se proçesi është i padëmshëm si dhe aparati arrin të lexojë sinjalet e trurit në kohë reale.
Aparati vetë ka një diametër prej 23 milimetra dhe 8mm i trashë. Gati sa një monedhë me 1000 fije të vogla të cilat lidhen me neuronet në tru.
Për tu instaluar në kafkë duhet një robot i cili gjithashtu u prezantua gjatë eventit. Gjatë proçedurës hiqet një copë nga kafka e pacientit e më pas futet proçesori. Një kafkë zakonisht është 10mm e trashë, Neuralink do të qëndronte i fshehur nën flokë.
Për demonstrimin u përdorën 3 derrkucë, njëri pa Neuralink, njëri me dhe një tjetër i cili e kish pasur të implantuar por më vonë ia kishin hequr. Të tre dukeshin plotësisht të shëndetshëm.
Më pas u demonstrua se si aparati arrinte të lexonte sinjalet menjëherë teksa arrinte të parashikonte pozicionin e gjymtyrëve të derrkucit me saktësi.
Aparati ka një bateri e cila zgjat gjithë ditën si dhe është i pajisur me Bluetooth i cili funksionon nga 4 deri në 9 metra distancë.
E ardhmja e konceptit synon të integrohet tek njerëz me probleme neurologjike si dëmtimet e trurit, humbja e dëgjimit dhe paraliza. Proçedura duhet të kryhet tërësisht nga roboti dhe për më tepër pa anestezi.
