Nëse ju e urreni ajrin e ndotur dhe nuk e keni aspak problem që të jeni gjatë gjithë kohës nën vështrimin e personave të ndryshëm, duket se Dyson ka lançuar një produkt pikërisht për ju.
Ky produkt i ri me emrin Dyson Zone ofron për ju kufje të cilat ofrojnë shërbimin noise-cancellation si dhe pastrimin e ajrit që ju thithni, për “vetëm” $949. Pajisja ekstra që vihet në pjesën e gojës dhe hundës pompon ajër të filtruar në mënyrë që ju të mos thithni ajrin e ndotur të Tiranës.
Dyson tregon se ky sistem filtrimi është në gjendje që të kapë 99% të grimcave që ndodhen në ajër duke përfshirë këtu dhe polenin, pluhurat, bakteret apo dhe viruset si H1N1.
Për herë të parë ky produkt u prezantua si një zgjidhje për të gjithë qytetarët që jetojnë në vende me ajër të ndotur në mbarë botën. Dyson Zone është një përgjigje e drejtpërdrejtë e studimit që tregonte se në Bashkimin Evropian 1 nga 5 persona preket nga dëmtimet e shkaktuara nga ndotja e ajrit.
Filtri ndodhet në pjesën e kufjeve, dhe ka aftësinë që të filtrojë 2.5 litra ajër në sekondë. Gjithashtu është i pajisur me një shtresë të pasur me karbon që kap ndotësit kryesor në qytete si dioksidi i azotit apo dioksidi i squfurit.
Nëse ju dëshironi të flisni mund ta largoni fare lehtë këtë pjesë ekstra që ju mbulon gojën. Freskueset do të fiken menjëherë sapo të zbulojnë një lëvizje të tillë dhe noise cancellation do të fiket në mënyrë që ju të dëgjoni zhurmat përreth jush.
