Në të ardhmen, tërheqja e një leve në Vacation Simulation mund të duket shumë më reale falë dorezave të reja haptike të krijuara nga Meta. Studiuesit në Reality Labs kanë punuar prej kohësh për krijimin e një doreze haptike e cila do të shtojë ndjesinë e prekjes në eksperiencat virtuale, duke e bërë metaverse-in më tepër reale.
Tashmë kompania ka treguar disa pamje të shkurtra të këtyre dorezave dhe dosjet e patentimit. Qëllimi final është krijimi i dorezave të lehta dhe të buta të cilat do të përdoren për të regjistruar lëvizjet e duarve dhe për të dhënë një feedback. “Vlera e përdorimit të duarve për të zgjidhur problemin e ndërveprimit në AR dhe VR është tepër i rëndësishëm.” tha drejtuesi i Reality Labs Research, Sean Keller.
“Njerëzit do të kenë mundësinë të prekin, të ndiejnë dhe të manipulojnë objektet virtuale njësoj si në botën reale.” shtoi ai. Prototipet e tanishëm përdorin mekanizmat pneumatike të përbëra nga motorë të vegjël që përdorin presionin e ajrit për të dhënë një feedback.
Mirëpo Meta nuk është kompania e vetme që po punon për krijimin e një doreze haptike që do të përdoret për të kontrolluar realitetin virtual. Kompania HaptX është angazhuar gjithashtu për krijim e një doreze e cila do të aplikohet në industrinë robotike.
