Gjatë tre dekadave të fundit janë lëshuar 15 versione të reja të Windows, por edhe sot, disa nga versionet më të vjetra të Microsoft vazhdojnë të funksionojnë në sfond. Në të gjithë botën, sisteme të vjetra Windows vazhdojnë të mbajnë në punë ashensorë, trena dhe sisteme të rëndësishme qeveritare.
Një raportim i ri nga BBC zbulon raste reale ku versione të vjetra të Windows përdoren ende në sisteme kritike. Një shembull është një ashensor spitali në New York që ende përdor Windows XP, versioni i fundit i të cilit humbi mbështetjen nga Microsoft në prill 2019. Disa bankomate përdorin versione edhe më të vjetra, si Windows NT i vitit 1993.
Stabiliteti i XP-së dhe integrimi i tij me sistemet kontrolluese të personalizuara e bëjnë atë të përshtatshëm për pajisje që s’kanë ndryshuar prej vitesh. Një teknik në New Jersey tha se kostoja e përditësimit është e lartë për shkak të nevojës për pajisje të reja, rregullore dhe softuer të ri të personalizuar.
Në Gjermani, kompania hekurudhore Deutsche Bahn kërkonte vitin e kaluar një punonjës me njohuri në MS-DOS dhe Windows 3.11, pasi disa trena ende përdorin këto sisteme për ekranet informative. Në San Francisko, sistemi i metrosë Muni kërkonte futjen e një floppy disk çdo mëngjes për të nisur kontrollin e trenave.
Në San Diego, printerë të mëdhenj LightJet që printojnë fotografi me cilësi muzeale funksionojnë ende me Windows 2000, për shkak të kostos së lartë të përditësimeve.
Rasti më ekstrem është Departamenti Amerikan i Çështjeve të Veteranëve, ku mjekët përdorin një sistem të vitit 1997 që funksionon mbi një platformë edhe më të vjetër nga viti 1985, e bazuar në MS-DOS.
Ndezja e sistemit zgjat deri në 15 minuta dhe kërkon komanda manuale. Zëvendësimi i tij pritet të përfundojë vetëm pas vitit 2031.
