Në një mbrëmje të ngarkuar me energji inovative dhe konkurrencë të fortë, një startup shqiptar arriti të ngjallë vëmendjen e jurisë dhe publikut në ACT NOW 2025. InsectIntel, i krijuar nga sipërmarrësi Endri Dhaskali, rrëmbeu çmimin e madh prej 50.000 euro, duke u pozicionuar si një nga iniciativat më premtuese në fushën e agroteknologjisë. Në një treg ku aplikacionet dhe shërbimet digjitale dominojnë narrativën, InsectIntel vjen me një ofertë krejt tjetër, një zgjidhje konkrete për një problem të përditshëm të fermerëve: menaxhimi i insekteve dëmtuese.
Çfarë është InsectIntel?
InsectIntel është një sistem inteligjent i krijuar për të ndihmuar fermerët të mbrojnë të korrat përmes teknologjisë së avancuar. Pajisja funksionon si një kurth digjital që identifikon në kohë reale insektet e dëmshme përmes kamerave të integruara me inteligjencë artificiale. Të gjitha të dhënat transmetohen në një platformë të centralizuar, një dashboard intuitiv dhe i personalizueshëm, që i ofron fermerëve informacion të saktë për të marrë vendime të shpejta dhe të sakta mbi ndërhyrjet që duhet të bëjnë në arë.
Ideja për këtë teknologji, siç tregon vetë themeluesi për Geek Room, lindi nga një boshllëk i dukshëm në terren: “Po sikur t’i japim fermerëve sy në arë, 24/7?” Një ide e thjeshtë në pamje të parë, por sfidat e para ishin të mëdha, që nga ndërlidhja e harduerit me softuerin, deri te funksionimi në kushte ku mungojnë edhe gjërat bazike si energjia elektrike ose lidhja stabile me internetin.
Përkundër këtyre sfidave, impakti i parë në terren ka qenë premtues. Deri tani janë instaluar dhjetë pajisje në ferma të ndryshme në Shqipëri dhe, sipas Endrit, feedback-u nga fermerët ka qenë pozitiv dhe shpesh emocional.
Njëri prej tyre më tha: ‘Është si të kem kamera në serrë që më njoftojnë menjëherë nëse ndodh diçka. Nuk jam më në errësirë.’ Pikërisht këtë duam të ndërtojmë, një sistem që nuk i lë fermerët në pritje të dëmit, por u jep siguri në kohë reale.
Kush është pas kësaj ideje?
InsectIntel është themeluar nga Endri Dhaskali, një sipërmarrës shqiptar me përvojë në teknologji dhe një vizion të qartë mbi nevojën për modernizim të bujqësisë. Rrugëtimi i tij nisi me ndërtimin e një prototipi të thjeshtë që u testua në ferma lokale, duke u shndërruar më pas në një sistem funksional të mbështetur nga teknologji të zhvilluara in-house. Endri e përshkruan këtë rrugëtim si një përzierje të pasionit për teknologjinë me ndjeshmërinë ndaj realitetit të fshatit shqiptar, ku puna e një sezoni të tërë mund të shkatërrohet nga një invazion i padukshëm.
Si u shpall fitues në ACT NOW 2025?
InsectIntel konkurroi mes gjashtë finalistëve të përzgjedhur në edicionin e sivjetshëm të ACT NOW, të cilët prezantuan zgjidhjet e tyre përpara një audience prej investitorësh, institucioneve dhe aktorëve ndërkombëtarë. Fituesi u shpall në ceremoninë përmbyllëse më 30 maj, duke u vlerësuar për mënyrën si teknologjia e AI dhe vizioni praktik bashkëjetojnë në një produkt konkret, me ndikim të menjëhershëm. Për Endrin, momenti i fitores ishte kulmimi i një pune shumëvjeçare:
Ishte një validim për të gjitha netët pa gjumë, orët në kod dhe testet në fusha të baltosura. M’u duk sikur jo vetëm fitoi ideja, por edhe vetë vizioni që Shqipëria mund të prodhojë zgjidhje me ndikim global.
InsectIntel në Plug and Play
InsectIntel është gjithashtu pjesë e edicionit të parë të Plug and Play Accelerator në Shqipëri, një program i organizuar në bashkëpunim me AADF, Bashkinë Tiranë, IDEMIA dhe Piramidën Tiranë. Ky hap e vendos InsectIntel në një rrjet global të startup-eve dhe investitorëve, duke i ofruar akses në mentorim ndërkombëtar, partneritete të reja dhe mundësi për zgjerim jashtë kufijve.
Të jesh pjesë e Plug and Play është si të kalosh nga ‘garage mode’ në ‘launch mode’. Na ka detyruar të mendojmë më strategjikisht, jo thjesht si një zgjidhje teknike, por si një biznes që mund të rritet dhe të eksportojë impakt.
E ardhmja e InsectIntel nuk ndalet në Shqipëri
Startup-i po përgatitet për të hyrë në tregje si Franca, Italia, Greqia dhe Spanja, vende ku kushtet klimatike dhe sfidat në bujqësi janë të ngjashme me ato të rajonit tonë.
Tregu i bujqësisë është global, por sfidat janë lokale. Ne besojmë se InsectIntel mund të bëhet një teknologji që përshtatet sipas çdo rajoni, një lloj franchise e bujqësisë inteligjente.
Nga ana teknologjike, gjithçka është zhvilluar nga vetë ekipi. Pajisja është një sistem IoT që funksionon me energji diellore, kap dhe identifikon insektet përmes një kombinimi të algoritmeve të personalizuara dhe vizionit kompjuterik. Në fund të zinxhirit është dashboard-i, që përpunon të dhënat në kohë reale dhe u jep fermerëve analiza dhe rekomandime.
Bujqësia inteligjente në Shqipëri: një revolucion i heshtur?
Endri Dhaskali e përfytyron të ardhmen e bujqësisë shqiptare si një simbiozë të domosdoshme midis traditës dhe teknologjisë. Shqipëria ka tokë pjellore dhe njerëz punëtorë, por shpesh i mungon informacioni. Me mjete si InsectIntel, dronë dhe analiza të avancuara të të dhënave, ai beson se bujqësia shqiptare mund të kalojë nga një sektor i pasigurt në një burim të qëndrueshëm të zhvillimit ekonomik.
E ardhmja është precision agriculture dhe ne jemi gati ta udhëheqim këtë revolucion.
