Robot Ballie i Samsung është rikthyer, tashmë në një formë të re si një projektor. Në CES 2024, Samsung zbuloi një version të përditësuar të robotit të tij të rrumbullakët Ballie, dhe veçoria e tij e re është se ai mund të projektojë gjërat në dysheme, mur ose tavan ndërsa ju ndjek nëpër shtëpi.
Në një video mjaft të bukur, Ballie e cila duket se vjen dhe në një ngjyrë të verdhë, kishte një sërë aftësish inteligjente projektimi, duke përfshirë luajtjen e një videoje të një zogu që të tërhiqte vëmendjen e një qeni, shfaqjen e një videotelefonate në një mur dhe shfaqja një video fitnesi për dikë që stërvitet.
Samsung thotë gjithashtu në një deklaratë për shtyp se Ballie mund të rregullojë automatikisht projeksionin në varësi të largësisë nga muri dhe kushteve të ndriçimit dhe se “është projektori i parë në botë që zbulon automatikisht qëndrimin e njerëzve dhe këndin e fytyrës dhe rregullon këndin optimal të projeksionit për ta.”
Por në video, roboti shërbeu gjithashtu si një asistent inteligjent në shtëpi, duke ndezur dritat, duke shpërndarë ushqim për qentë dhe duke i dërguar mesazhe dikujt për t’i treguar se çfarë po bënte. Ballie gjithashtu mund t’ju ndjekë nëpër shtëpi dhe t’ju përshëndesë kur hyni në derë.
Në CES 2020, ku Samsung prezantoi për herë të parë Ballie, roboti u rrotullua në skenë, por këtë vit kompania e tregoi robotin vetëm përmes videos. Dhe Samsung nuk ndau asnjë detaj nëse ose kur mund të ofrohet Ballie ose sa mund të kushtojë. Megjithatë, ishte kënaqësi të shihje Ballie-n të shfaqej edhe një herë në CES; shpresojmë që Samsung të lançojë produktin këtë herë.
