Sam Altman, CEO i OpenAI ka mohuar publikisht raportimet se kompania kishte nisur punën për të trajnuar GPT-5, vetëm një muaj pas prezantimit të GPT-4. Intervistuesi Lex Fridman pyeti Altman në lidhje me mendimet e tij mbi letrën publike të firmosur nga shumë persona të rëndësishëm ku kërkohej ndalimi i zhvillimit të sistemeve të reja gjigande të inteligjencës artificiale.
Themeluesi i OpenAI u përgjigj me një kritikë: “Në një version më të hershëm të letrës pretendohej se OpenAI kishte nisur trajnimin e GPT-5 aktualisht. Ne nuk e kemi bërë një gjë të tillë, dhe nuk do të bëjmë për disa kohë. Pra në këtë kuptim letra ishte pak qesharake.”
Megjithatë ai e bëri të qartë se mos-trajnimi i GPT-5 nuk do të thotë që në GPT-4 nuk do të ketë përmirësime të ndjeshme. Ekzistojnë mënyra për të rritur kapacitetin e teknologjisë përtej prezantimit të një numri të ri që përfaqëson një version të teknologjisë.
“Ne po punojmë me gjëra të tjera në GPT-4 që mendojmë se kanë probleme me sigurinë dhe që duhen adresuar. Këto problematika nuk janë përmendur asnjë moment në letër,” shtoi Altman. Ai tregoi se OpenAI shpenzoi 6 muaj për të trajnuar GPT-4 para prezantimit të tij publik. Altman pranoi gjithashtu se është e rëndësishme të studiojmë sigurinë e këtij modeli.
Kur u pyet nëse OpenAI do të vazhdojë të jetë transparente në të ardhmen, ai tha se “kompania planifikon të vazhdojë të jetë transparente”.
