Google po përgatitet t’i përgjigjet suksesit shumë të madh të ChatGPT duke prezantuar shërbime të reja AI.
CEO i kompanisë Sundar Pichai i tregoi investitorëve ditën e enjte se “AI është teknologjia më e rëndësishme” mbi të cilën kompania po punon. Këto komente vijnë disa vite pasi ai tregoi në një deklaratë se Google është tashmë një kompani që ka AI në themel të saj.
“Shumë shpejt njerëzit do të jenë në gjendje të ndërveprojnë me modelin tonë më të ri dhe më të fuqishëm që do të vijë në bashkëpunim me Search, nëpërmjet mënyrave tona eksperimentale dhe inovative.” tha Pichai.
Në dhjetorin e vitit të kaluar, ekipi menaxhues i Google aktivizoi “kodin e kuq” pas lançimit të chatbot ChatGPT nga OpenAI.
Microsoft është kompania kryesore e cila ka vendosur të investojë në ChatGPT, dhe së shpejti po planifikon të lançojë një version të motorit të kërkimit Bing që ka të inkorporuar teknologjinë e ChatGPT. Shërbimi që ka si qëllim ofrimin e përgjigjeve ekzakte në vend të shfaqjes së links të ndryshëm në bazë të kërkimit, mund të lançohet në muajin mars.
Google ka në plan që të lançojë një version demo të Google Search me AI chatbot më vonë gjatë këtij viti.
