Ndërsa përparimi kryesor nga njëri smartphone në tjetrin vazhdon të mbetet kamera prej shumë kohësh tashmë, duket krejt e logjikshme që edhe aksesorët të profesionalizohen në këtë drejtim. Asgjë nuk krahasohet me një lente të projektuar që në fillim për të qenë pjesë e aparatit, por ekspertiza e Canon padyshim nuk mund të mohohet.
Sipas një imazhi të rrjedhur, gjigandi i kamerave është duke punuar për një aksesor të montueshëm në smartphone, të aftë për largësi të ndryshme fokusimi e pse jo edhe lentesh.
Lentet shtesë kanë kohë që qarkullojnë, por kur shohim profesionistë të fushës të futen në lojë padyshim na bëhet qejfi. Imazhet nuk e qartësojnë si do të kapet mekanizmi në smartphone, ndoshta me kapëse ose magnete. Nuk shohim askund kabull për lidhje ndaj edhe spekulojmë se ajo do të lidhet me wireless dhe do të kontrollohet nga një app.
Nuk ka ende detaje për madhësinë fokale, ideale do të ishte ndërrimi i saj sipas dëshirës.
E si gjithmonë kujtojmë se asgjë nuk është konfirmuar, kompanitë eksperimentojnë shpesh me shumë ide, por asgjë nuk na garanton se do i shohim në vitrina, njejtë edhe me këtë aksesor.
