OpenAI është pranë prezantimit të një browser-i të ri të mbështetur nga inteligjenca artificiale, me synimin për të sfiduar dominimin e Google Chrome. Ky shfletues pritet të dalë në fillim të muajit gusht dhe do të përdorë AI për të ndryshuar rrënjësisht mënyrën se si përdoruesit kërkojnë dhe ndërveprojnë me internetin, duke i dhënë OpenAI akses të drejtpërdrejtë në të dhëna të vlefshme të përdoruesve—një element kyç i biznesit të reklamave të Google.
Ndryshe nga shfletuesit tradicionalë, shfletuesi i OpenAI do të ruajë kërkime të ndryshme të përdoruesit brenda një ndërfaqeje bisede të ngjashme me ChatGPT, duke ulur nevojën për të hapur faqe të ndryshme. Ky është një hap pjesë e strategjisë më të gjerë të OpenAI për të përfshirë AI në jetën dhe punën e përditshme të përdoruesve. Me integrimin e agjentëve AI si Operator, shfletuesi do të kryejë veprime në emër të përdoruesit, si rezervime apo plotësim formularësh.
Edhe pse OpenAI nuk ka komentuar, burime të afërta konfirmojnë se kjo nismë është pjesë e zgjerimit të kompanisë, pas blerjes për 6.5 miliardë dollarë të startup-it të pajisjeve AI “io”, themeluar nga ish-shefi i dizajnit të Apple. Shfletuesi mund të bëhet një platformë qendrore për agjentët AI që veprojnë në emër të përdoruesve.
Megjithatë, konkurrenca është e fortë. Google Chrome zotëron mbi dy të tretat e tregut global me mbi 3 miliardë përdorues. Safari i Apple ka 16%. Konkurrentët si Perplexity (me shfletuesin “Comet”), The Browser Company dhe Brave kanë nisur tashmë alternativa me AI.
Ky zhvillim mund të kërcënojë modelin bazë të biznesit të Google, i cili tashmë po hetohet nga Departamenti Amerikan i Drejtësisë për monopol në kërkimin online.
