Gjatë eventit të ditës së sotme, Apple prezantoi gjeneratën e 9-të të Apple Watch si dhe gjeneratën e dytë të orës më cilësore Apple Watch Ultra.
Një ndër ndryshimet kryesore në Apple Watch Series 9 është përdorimi i S9 SiP (System in Package). CPU ka 5.6 miliardë tranzistorë dhe GPU është 30% më i shpejtë, të cilat sjellin përmirësime si përshembull proçesimi i komandave të Siri në pajisje. Apple ka përfshirë gjithashtu gjeneratën e dytë të proçesorit ultra wideband për të ndihmuar në gjetjen e orës smart në raste kur ju ka humbur.
Një tjetër përmirësim është bërë në ekranin e këtyre orave, pasi janë dy herë më të ndritshme se orat e serisë 8, me ndriçim maksimal deri në 2,000 nits.
Në Serinë 9 ofrohet dhe shërbimi “double-tap”, i cili funksionon në bazë të prekjes së gishtit tuaj tregues me gishtin e madh të dorës për të hapur telefonata ose për aktivizimin e shërbimeve të tjera si luajtja e muzikës. Ky shërbim është mjaft i ngjashëm me atë që ofrohet dhe në Apple Vision Pro, si dhe në Assistive Touch. “Double-tap” pritet të vijë përmes një update-i të software-it në tetor.
Apple Watch Series 9 do të vijë në treg në ngjyrat: Pink, Starlight, Silver, Midnight dhe Product Red për versionin me material alumini dhe Gold, Silver dhe Graphite në versionet prej çeliku. Çmimi për këto ora smart do të nisin nga €459.
Apple Watch Ultra 2
Dizajni i kësaj ore është mjaft i ngjashëm me atë të gjeneratës së parë, gjë që na tregon se ndryshimet më të rëndësishme janë bërë në pjesën e brendshme të orës. Ultra 2, njësoj si Apple Watch Series 9 do të fuqizohet nga S9 SiP.
Ekrani i Ultra 2 është akoma dhe më i avancuar, pasi tashmë arrin një ndriçim maksimal deri në 3,000 nits, që e bën atë ekranin më të ndritshëm të përdorur ndonjëherë nga Apple. Gjithashtu kasa e ekranit është prej titaniumi të ricikluar. Kompania premton se bateria mund të zgjasë deri në 72 orë nëse përdoruesit përdorin low-power mode (në modalitet normal deri në 36 orë).
Fuqia e Apple Watch Ultra 2 do të plotësohet me prezantimin e watchOS 10, i cili do të sjellë widgets, ikona të ridizenjuara si dhe shërbime të reja me fokus në aktivitetet sportive.
Apple Watch Ultra 2 do të vijë në treg me një çmim prej €899.
Për t’u vlerësuar janë dhe përpjekjet e kompanisë për të ulur sa më shumë të jetë e mundur ndikimin në ndryshimet klimatike, duke i prodhuar pajisjet në fabrika me emëtime neto zero të gazeve. Gjithashtu duke filluar nga viti 2030 Apple nuk do të ofrojë më rripa lëkure për orat smart.
