Apple ka nisur zhvillimin e një teknologjie të re në bashkëpunim me kompaninë Synchron, me qendër në New York dhe të mbështetur nga Jeff Bezos dhe Bill Gates. Synimi i kësaj teknologjie është t’i mundësojë njerëzve, veçanërisht atyre me paaftësi të theksuara fizike, të kontrollojnë pajisjet Apple si iPhone, iPad dhe Vision Pro përmes sinjaleve nervore të kapura nga një implant truri.
Ndryshe nga Neuralink e Elon Musk, e cila kërkon ndërhyrje të thellë kirurgjikale në tru, pajisja e Synchron e quajtur Stentrode vendoset në sipërfaqen e trurit përmes enëve të gjakut – një procedurë më pak invazive. Ajo përdor elektroda për të lexuar sinjalet e trurit dhe për t’i përkthyer në komanda digjitale, që mund të përdoren për të naviguar nëpër ekrane.
Kjo teknologji funksionon me Switch Control, një funksion ekzistues i aksesueshmërisë në sistemin operativ të Apple, i cili lejon përdoruesit të kontrollojnë pajisjet me mjete ndihmëse si joystick– dhe më vonë edhe me sinjale nervore nga Stentrode.
Që nga viti 2019, Synchron ka implantuar Stentrode te 10 pacientë, përfshirë Mark Jackson, një banor i Pittsburgh me sklerozë laterale amiotrofike. Gjatë një demonstrimi për Wall Street Journal, ai përdori Apple Vision Pro të kontrolluar përmes trurit për të eksploruar virtualisht një majë mali në Zvicër. Ai theksoi se navigimi ishte më i ngadaltë krahasuar me pajisjet tradicionale ose me Neuralink, që përpunon më shumë të dhëna falë më shumë elektrodave.
Këto zhvillime ndodhin në pritje të miratimit të plotë nga FDA për implantet, gjë që pritet të zgjasë disa vite. CEO i Synchron, Dr. Tom Oxley, vlerësoi Apple për rolin e saj si pionier në një paradigmë të re ndërfaqeje, duke thënë se njohja e sinjaleve të trurit si input zyrtar në pajisjet Apple krijon mundësi të reja për personat aftësi të kufizuara.
