Apple ka njoftuar se do të organizojë eventin e saj vjetor të fokusuar tek iPhone më 9 shtator 2025 në Apple Park, Cupertino. Aktiviteti do të transmetohet drejtpërdrejt në faqen zyrtare të Apple, në YouTube dhe në aplikacionin Apple TV.
Ngjarja do të shënojë prezantimin e serisë së re iPhone 17, e cila përfshin katër modele: iPhone 17, iPhone 17 Pro, iPhone 17 Pro Max dhe risinë më të madhe – iPhone 17 Air. Ky i fundit vjen si zëvendësues i versionit “Plus” dhe do të jetë iPhone-i më i hollë dhe më i lehtë i Apple deri tani. Ai pritet të ketë ekran 6.6 inç, modem-in Apple C1 dhe një kamerë të vetme në pjesën e pasme.
Modelet iPhone 17 Pro do të dallohen për një trup më të fortë me kornizë alumini dhe një modul kamere të ridizajnuar në formë shiriti. Të gjitha versionet e reja do të përfshijnë çipat A19 ose A19 Pro, si dhe ProMotion si standard në të gjithë linjën, duke sjellë ekrane më të rrjedhshme.
Përveç iPhone, Apple pritet të sjellë një përditësim të plotë të linjës së orëve inteligjente, me Apple Watch Series 11, Apple Watch Ultra 3 dhe Apple Watch SE 3 – hera e parë pas tre vitesh që të gjitha modelet përditësohen njëkohësisht.
Sipas raportimeve, mund të prezantohen gjithashtu AirPods Pro 3 me dizajn të ri, një HomePod mini i përmirësuar dhe një Apple TV 4K i rifreskuar.
Ngjarja do të shërbejë gjithashtu për shpalljen e datave të lançimit të sistemeve operative të reja: iOS 26, iPadOS 26, macOS Tahoe dhe platformave të tjera të Apple.
