Një anije kozmike e NASA i është afruar diellit më tepër se kurrë më parë, duke u futur kështu në atmosferën e njohur si corona. Kontakti i parë i suksesshëm me shtresën e jashtme të Diellit u lajmërua në një mbledhje të American Geophysical Union pas një udhëtimi prej 150 milionë kilometrash nga Toka.
Parker Solar Probe qëndroi për 5 orë në shtresën corona gjatë muajit prill në përballjen e tetë nga afër me Diellin. Trajektoria spirale e sondës bënte që ajo të afrohej gradualisht pas çdo rrotullimi, dhe NASA tregon se gjatë rrotullimeve të fundit Parker Solar Probe duhet të jetë futur brenda shtresës së jashmte të atmosferës diellore. Më pas shkencëtarëve iu nevojitën disa muaj për të rimarrë të dhënat e grumbulluara dhe për t’i analizuar.
“Fakti se sonda ‘preku’ Diellin është një moment i jashtëzakonshëm.” tha Thomas Zurbuchen, administrator i asociuar në NASA.
Parker u lançua nga Toka në vitin 2018 dhe u afrua deri në 13 kilometra pranë qendrës së Diellit. Ai u fut në atmosferën e Diellit të paktën 3 herë me një shpejtësi prej 100 kilometrash në sekond, ku temperaturat shkojnë deri në 2 milionë gradë Celsius.
Shkencëtarët tashmë shpresojnë të mësojnë më tepër rreth stuhive diellore dhe shpërthimet që interferojnë me jetën në Tokë.
