Agjencia e modernizimit teknologjik të Danimarkës planifikon të zëvendësojë produktet e Microsoft me një software të ri me burim të hapur, për të reduktuar varësinë nga kompanitë teknologjike amerikane. Ministrja daneze për Digjitalizimin, Caroline Stage Olsen, tha për gazetën Politiken se më shumë se gjysma e stafit të ministrisë do të kalojë nga Microsoft Office në LibreOffice muajin tjetër, me synim përdorimin vetëm të softuerit me burim të hapur deri në fund të vitit.
Ky ndryshim synon gjithashtu të shmangë kostot për mirëmbajtjen e sistemeve Windows 10, të cilat do të humbasin mbështetjen zyrtare në tetor. LibreOffice, i zhvilluar nga organizata jofitimprurëse The Document Foundation me seli në Berlin, është një program falas që përfshin mjete për përpunim teksti, tabela, prezantime, grafikë dhe baza të dhënash, dhe është i disponueshëm për Windows, macOS dhe Linux.
Stage u shpreh se edhe pse ky hap është drejt “sovranitetit digjital”, ministria mund të rikthehet te produktet e Microsoft nëse kalimi rezulton shumë kompleks. Deri tani, Microsoft nuk ka komentuar për këtë vendim.
Vendimi i ministrisë vjen pas veprimeve të ngjashme nga dy bashkitë më të mëdha të Danimarkës, Kopenhaga dhe Aarhusi, që kishin njoftuar më herët largimin nga softueri i Microsoft për arsye financiare, dominimin e tregut dhe tensionet politike me SHBA-në. Gjatë presidencës së Donald Trump, këto shqetësime u rritën, sidomos në lidhje me mbrojtjen e të dhënave.
Ky trend pasqyron një lëvizje më të gjerë në Evropë drejt pavarësisë digjitale. Shteti gjerman Schleswig-Holstein njoftoi gjithashtu kalimin në LibreOffice dhe Open-Xchange, dhe planifikon të kalojë tërësisht në Linux në vitet në vijim. Ata e quajtën këtë një “punë digjitale të pavarur, të qëndrueshme dhe të sigurt.”
