INSTAT ka publikuar me datë 13 dhjetor të vitit 2021 rezultatet e Anketës së Përdorimit të Teknologjisë së Informacionit, ku tregohet se interneti është një domosdoshmëri për qytetarët e këtij vendi, pasi ai përdoret nga 79,3% e popullsisë në moshën 16-74 vjeç. Nga këto persona që e përdorin internetin, 91,7% e tyre e përdorin çdo ditë dhe 7,7% e përdorin të paktën një herë në javë.
Gjithashtu përmes kësaj ankete ne shikojmë që 98,7% e individëve e aksesojnë internetin përmes telefonave inteligjentë, ndërkohë që 22,8% e tyre e përdorin internetin përmes laptopit.
Një trend në rritje nga viti në vit është kryerja e thirrje përmes aplikacioneve si Skype, Viber apo WhatsApp. 98% e individëve kryejnë thirrje përmes aplikacioneve të lartpërmendura, një rritje me 2,1 pikë përqindjeje krahasuar me vitin 2020.
Dhe përqindja e familjeve shqiptare që kanë akses në internet është rritur nga 83,3% gjatë vitit të kaluar në 88,3%. 530.000 familje kanë një akses në internet me rrjet fiks broadband, ndërsa përqindja e familjeve me akses në internet përmes lidhjes mobile broadband është 99,1%, krahasuar me 90,7% në vitin 2020.
Gjatë 2021 blerjet online janë kryer nga 21,4% e popullsisë së grupmoshës 16-74 vjeç, trend i cili është rritur me 1,9 pikë përqindjeje krahasuar me vitin paraardhës. Produktet më të blera janë rroba / këpucë / aksesorë (88,9%) dhe më pas ushqimet apo pijet (24,6%).
Për sa i përket grupmoshës që përdorin më tepër TIK, dominon grupmosha 16-24 vjeç me 96,7%. Individët e grupmoshës 65-74 vjeç që nuk e kanë përdorur asnjëherë internetin llogariten të jenë rreth 51,1%.
Gjatë vitit 2021, 81% e burrave dhe 78,3% e grave nga 16 në 74 vjeç kanë treguar se janë përdorues të internetit. Burrat dominojnë në përdorimin e përditshëm të internetit, ndërsa gratë që e përdorin internetin një herë në javë janë më të shumta (53,1%).
Mirëpo gratë gjatë 2021 kanë kryer më së shumti blerje online si produkte për kujdes personal, produkte për fëmijë ose lodra për to. Preferencat e burrave për sa i përket blerjeve online janë mallrat sportive, shërbimet e ushqimit nga restorantet dhe ushqime apo pije nga dyqanet.
