Gati çdo gjë që përdorim sot ka nevojë për një nivel sigurie, nëse nuk është një PIN apo biosiguri, me shumë mundësi duhet një fjalëkalim. Të ruash llogaritë e tua me një “12345678” të thjeshtë nuk është ideja më e mirë në botë. Për të krijuar një password të fortë ka mjaft mënyra kreative, ja disa prej tyre.
1. Kombino fjalë pa lidhje me njëra tjetrën.
Merr fillimet e 2, 3 apo 4 fjalëve të cilat nuk kanë lidhje me njera tjetrën dhe formo një fjalë të re. Për më shumë siguri shkronjat e para bëji të mëdha: “Tenxhere“, “Rrugë“, “Makinë” bëjnë: “TenRruMak“.
2. Kombino një emër me disa numra
Mjafton të marrësh emrin tënd, për shembull “Eralda” dhe targën e makinës së dikujt në familje “465” dhe vendose përpara ose prapa. “465Eralda“.
3. Zëvendëso njërën shkronjë me një numër apo simbol të ngjashëm.
Mund të marrësh një emër ose një fjalë çfarëdo dhe disa prej shkronjave t’i zëvendësosh me simbole apo numra të ngjashëm. Shembull: “P@ssw0rd“.
4. Përzje fjalë dhe numra bashkë.
Emri yt apo i dikujt që e ke të afërt është një zgjedhje e mirë, në mes ose në një apo disa pjesë të tij përfshi disa numra. “Ma123rse456l“, ndonjë shenjë pikësimi në fund ose fillim do të bënte edhe më shumë punë.
5. Përzje fjalë pa kuptim, simbole dhe numra.
Nëse merr një fjalë e cila nuk do i shkojë askujt në mendje dhe mes secilës shkronjë të fusësh nga një shkronjë apo simbol duhet të jetë një fjalëkalim goxha i fortë, por nga ana tjetër edhe i vështirë për tu mbajtur mend. Por sa më i vështirë për t’u memorizuar aq më i fortë fjalëkalimi. Për shembull “E7r9t8@Q#h%Hy+M”.
