Retro Biosciences, kompania e mbështetur nga Sam Altman që ka si mision zgjatjen e jetëgjatësisë së njerëzve, po hyn në fazën e parë të provave klinike me një pilulë eksperimentale kundër Alzheimerit, ndërsa ruan ambicien për të shtuar 10 vite të shëndetshme në jetën e njeriut. CEO Joe Betts-LaCroix, një shkencëtar dhe sipërmarrës me përvojë, e krahason synimin e tij me një ndryshim tepër të madh dhe është i emocionuar të shikojë rezultatet e punës së Retro Bioscience.
Që nga themelimi në 2021 me investim fillestar 180 milionë dollarë, Retro ka punuar në mënyrë paraklinike për disa projekte. Pritet që deri në fund të 2025 të administrohet doza e parë e pilulës RTR242 në Australi, ku procesi për fazën e parë është më i shpejtë. Ky ilaç synon të rigjallërojë autofaginë, procesi natyror i riciklimit qelizor që dëmtohet me moshën, duke pastruar proteinat e prishura dhe duke luftuar Alzheimerin e Parkinsonin.
Retro po zhvillon edhe dy produkte të tjera: RTR890 për prodhimin e qelizave të reja të gjakut për pacientë me sëmundje si leuçemia dhe RTR888, një terapi me qeliza burimore për sëmundje të sistemit nervor qendror. Ndryshe nga ilaçet ekzistuese që thjesht ngadalësojnë përkeqësimin, Betts-LaCroix synon trajtime që e “kthejnë mbrapsht” procesin e plakjes.
Megjithatë, kompania duhet të sigurojë rezultate domethënëse për të tërhequr rreth 1 miliard dollarë investime për prova më të mëdha, duke konkurruar gjigantë si Altos Labs e financuar nga Jeff Bezos.
Një shenjë e radikalizmit potencial erdhi në gusht, kur OpenAI dhe Retro njoftuan se një “GPT-4b micro” për dizajn proteinash rriti 50-fish markerët e riprogramimit qelizor, një fushë premtuese për kthimin e qelizave në një gjendje më të re. Për Betts-LaCroix, edhe 10 vite shtesë jetë të shëndetshme do të ishin një arritje madhore në historinë e mjekësisë, duke tejkaluar ndikimin e kurimit të kancerit apo sëmundjeve të zemrës.
