Shkencëtarë kinezë kanë prezantuar një risi që mund të revolucionarizojë trajtimin e frakturave: një “ngjitës kockash” që bashkon fragmentet e thyera brenda vetëm 3 minutash.
E quajtur “Bone 02”, kjo substancë u zhvillua nga një ekip kërkimor në Provincën Zhejiang dhe u prezantua më 10 shtator. Udhëheqësi i projektit, kirurgu ortoped Lin Xianfeng, u frymëzua nga mënyra se si guaskat e detit ngjiten fort në ura nën ujë, duke e parë këtë mekanizëm si model për një lidhje të fuqishme e të qëndrueshme.
Sipas Lin, ngjitësi arrin fiksim të saktë për vetëm dy deri në tre minuta, edhe në mjedise me gjak të bollshëm, siç janë plagët e hapura. Për më tepër, ai absorbohet natyrshëm nga trupi gjatë procesit të shërimit, duke shmangur nevojën për ndërhyrje të dytë kirurgjikale për heqjen e implanteve. Në testet laboratorike dhe klinike, “Bone 02” ka kaluar mbi 150 prova me pacientë dhe ka treguar siguri e efektshmëri të lartë.
Rezultatet teknike janë mbresëlënëse: kockat e ngjitura përballuan një forcë maksimale mbi 180 kg, një rezistencë prerjeje rreth 0.5 MPa dhe rezistencë shtypjeje rreth 10 MPa. Këto tregues sugjerojnë se ngjitësi mund të zëvendësojë pllakët metalike dhe vidat që përdoren zakonisht për të stabilizuar frakturat, duke ulur rrezikun e infeksioneve apo reagimeve të trupit ndaj metaleve.
Ndërsa sot ekzistojnë disa lloje mbushësish kockash, ato nuk kanë veti ngjitëse të vërteta. Përpjekjet e hershme që nga vitet 1940 me xhelatinë, rrëshira epokside dhe akrilate dështuan për shkak të problemeve me përputhshmërinë biologjike. Zbulimi i “Bone 02” shënon një hap të madh përpara dhe mund të shndërrojë mënyrën se si mjekësia ortopedike trajton frakturat, duke ofruar shërim më të shpejtë, më pak invaziv dhe më të sigurt.
