Autoritetet federale shëndetësore në SHBA dhanë miratimin të martën për një ilaç të ri eksperimental që ka treguar se vonon fillimin e sëmundjes së Alzhaimerit.
Donanemab, i prodhuar nga Eli Lilly, është ilaçi i dytë që ka fituar “bekimin” e Food and Drug Administration (FDA) për të trajtuar pacientët që shfaqin simptoma të hershme të sëmundjes, më së shumti dëmtim të aftësive njohëse. Vitin e kaluar, autoritetet aprovuan dhe përdorimin e ilaçit lecanemab, i tregtuar me emrin e markës Leqembi, pasi demonstroi një rënie të ngjashme në përparimin e Alzhaimerit në një grup ku u testua.
Trajtimet nuk janë një kurë, por të parat që ndryshojnë fizikisht rrjedhën e sëmundjes në vend që të adresojnë thjesht simptomat e saj, tha FDA. Eli Lilly me bazë në Indianapolis raportoi suksesin e provës së saj një vit më parë, dhe më pas aplikoi për autorizimin e FDA-së që u njoftua sot. Ekspertët në atë kohë thanë se “mund të jetë fillimi i fundit të sëmundjes së Alzhaimerit“, e cila prek pothuajse 7 milionë njerëz në SHBA, kryesisht amerikanë të moshuar, sipas Shoqatës së Alzhaimerit.
“Kisunla tregoi rezultate shumë domethënëse për njerëzit me simptoma të hershme të Alzhaimerit, të cilët kanë nevojë urgjente për opsione efektive trajtimi,” tha të martën Anne White, nënkryetare ekzekutive e Eli Lilly, duke iu referuar donanemabit me emrin e markës me të cilën do të shitet.
“Ne e dimë se këto ilaçe kanë përfitimin më të madh të mundshëm kur njerëzit trajtohen më herët në sëmundjen e tyre dhe ne po punojmë shumë në partneritet me të tjerët për të përmirësuar zbulimin dhe diagnozën.” Sipas Eli Lilly, Kisunla ngadalësoi rënien e aftësive njohëse dhe funksionale deri në 35% pas 18 muajsh, krahasuar me pacientët që morën një placebo. Ai gjithashtu uli rrezikun e pjesëmarrësve për të përparuar në fazën tjetër klinike të sëmundjes deri në 39%, tha kompania. I marrë me infuzion çdo katër javë, antitrupi monoklonal funksionon duke synuar depozitat e proteinës amiloide në tru, një tregues kyç i pranisë së Alzhaimerit.
Ilaçi mund të ndihmojë trupin të eleminojë grumbullimin e tepërt të pllakave amiloide dhe të ngadalësojë rënien e aftësive njohëse të njerëzve për të kujtuar informacione të reja, data të rëndësishme dhe takime; planifikuar dhe organizuar; për të përdorur pajisje shtëpiake dhe për të menaxhuar financat.
