Këto vitet e fundit industria e smartphonëve ka pasur një armik të përbashkët: kornizat e ekranit, e ndërsa gjithçka mund të eleminohet totalisht kamera frontale mbetet një problem.
Apple nuk ka lëvizur nga designi tashmë ikonik i notch-it, Samsung ka përqafuar hole-punch camera në produket kryesore por pafund çudira kemi parë nga prodhues të tjerë.
Dhe nëse mendove se i kishe parë të gjitha mundësitë mekanike për eleminimin e kamerës selfie, ja ku del Xiaomi dhe na i shkund besimet të gjithëve.
Kompania ka patentuar një koncept të padëgjuar ndonjëherë, një ekran që ndahet më dysh dhe rrotullohet mbrapa duke përdorur setin kryesor të kamerave për të gjitha funksionet.
Pra pjesa e sipërme e smartphonit, ndahet rrotullohet dhe të lejon të bësh selfie me kamerën e prapme dhe të vetme të tij.
Patenta është regjistruar nga vetë Xiaomi tek
Chinese National Intellectual Property Administration, shoqëruar nga skica ilustruese se si do të funksionojë koncepti.
Kjo ide paraqet një sërë sfidash dhe ndërfaqja është më e vogla pasi pjesa e mbetur e ekranit do të përshtatej me dimensionin e ri dhe ekrani i pasëm si diçka shtesë. Por kjo është një pjesë mekanike, dhe si e tillë është shumë më e disponuar të prishet, mbrojtja ndaj ujit as që bëhet fjalë, dhe mekanizmat me kalimin e kohës humbasin efektivitetin.
Megjithatë vetëm se është regjistruar si patentë nuk do të thotë se detyrimisht do të arrijë të finalizohet, sado interesant të duket si produkt, tregu është i orientuar drejt gjërave më kompakte.
