Xiaomi Indonesia ka treguar se për momentin prodhimi i smartphone-ve Redmi Note 10 ka ndaluar, dhe i fton të gjithë përdoruesit të blejnë produkte të tjera nga e njejta linjë. Sipas divizionit lokal të CNBC International, kjo gjë ka ardhur si pasojë e mungesës së proçesorëve, dhe shumë shpejt pritet të prekë dhe tregjet e tjera.
Xiaomi Redmi Note 10 është variant vanilla nga seria me të njejtin emër. Ajo fuqizohet nga një proçesor Snapdragon 678 dhe ka një kamera kryesore 48MP. Një nga karakteristikat më të mira të këtij smartphone-i është karikimi i shpejtë 33W i baterisë 5,000mAh që fuqizon ekranin OLED.
Me sa duket këto karakteristika ishin të mjaftueshme për qytetarët në Indonezi, të cilët blenë të gjitha pajisjet në tregun vendas. Rrjetet sociale zyrtare të Xiaomi Indonesia i kanë bërë thirrje qytetarëve të blejnë modelet e tjera si Redmi Note 10 Pro, Redmi Note 10S dhe Redmi Note 10 5G.
Prodhuesit e proçesorëve po përballen me probleme dhe nuk po arrijnë dot të plotësojnë të gjitha nevojat e tregut për proçesorë. Kjo situatë u agravua disi dhe nga përhapja e pandemisë. Disa fabrika janë detyruar të punojnë me një grup të limituar njerëzish për të parandaluar përhapjen e COVID-19.
