Kompania kineze Vivo ka prezantuar X300 dhe X300 Pro, dy telefonat e rinj flagship që afrohen më shumë se kurrë me modelet e saj më të shtrenjta “Ultra”. Që të dy vijnë me përmirësime të theksuara në kamera dhe performancë, duke synuar të ofrojnë teknologjinë premium në një çmim më të arsyeshëm.
Fokusi kryesor i Vivo mbetet fotografia. X300 dhe X300 Pro përfshijnë sensorin e ri 200-megapiksel HPB, zhvilluar në bashkëpunim me Samsung. Modeli Pro e përdor këtë sensor për kamerën telefoto 85 mm, me performancë të ngjashme me X200 Ultra, ndërsa kamera kryesore përdor sensorin Sony LYT-828, që ofron ndriçim më të mirë dhe aperture më të gjerë. Kamerat mbështesin regjistrim 4K në 120fps dhe video me 10-bit Log, duke u pozicionuar mes më të mirave në treg.
Edhe modeli bazë, X300, ofron specifika të fuqishme me kamerë kryesore 200 MP, telefoto 50 MP dhe ultra të gjerë 50 MP. Të dy telefonat mbështesin telephoto extender, një lentë shtesë 2.35x që vendoset përmes një kutie të dedikuar, pjesë e “Photography Kit”, që përfshin edhe një dorezë me bateri të integruar.
Në aspektin e performancës, pajisjet fuqizohen nga çipi MediaTek Dimensity 9500, rival i Snapdragon 8 Gen 5, dhe ofrojnë karikim të shpejtë 90W me kabllo dhe 40W pa kabllo. Kanë gjithashtu rezistencë IP68/IP69, sensor ultrasonik për shenjën e gishtit dhe bateri silicon-carbon që, sipas Vivo, zgjasin sa ato me kapacitet më të madh tradicional.
X300 Pro ka ekran 6.78 inç, ndërsa X300 është më kompakt me 6.31 inç. Çmimet në Kinë fillojnë nga rreth $620 për X300 dhe rreth $745 për Pro-n. Vivo pritet t’i sjellë këto modele edhe në tregjet aziatike dhe evropiane, me OriginOS 6 që zëvendëson përfundimisht ndërfaqen e vjetër Funtouch OS.
