Smartphone-t modernë Android tashmë përfshijnë shërbime kundër vjedhjes që bllokojnë pajisjen dhe parandalojnë rivendosjen e saj në gjendjen e fabrikës pa autorizim, duke e bërë më të vështirë për hajdutët ta rishesin. Megjithatë, Google planifikon të forcojë më tej këto masa mbrojtëse duke bllokuar plotësisht aksesin në çdo funksion të pajisjeve të vjedhura.
Këtë javë, Google organizoi “The Android Show: I/O Edition”, ku dha një pamje paraprake të Android 16 dhe Wear OS 6. Edhe pse vëmendjen kryesore e mori Gemini AI, kompania prezantoi gjithashtu një version të përditësuar të funksionit Factory Reset Protection, që synon t’i bëjë pajisjet Android të vjedhura praktikisht të papërdorshme. Përditësimet e reja të sistemit operativ do të bllokojnë çdo tentativë për fshirjen e të dhënave përmes metodave të dyshimta, duke e bërë të pamundur përdorimin nga hajdutët. Pronari mund ta rikuperojë pajisjen përmes verifikimit të identitetit.
Google nuk ndau detaje teknike për funksionin e ri, por një screenshot sugjeron që ky mjet i përditësuar do të çaktivizojë pajisjen nëse zbulohet një përpjekje për e dyshimtë për fshirjen e të dhënave. Mesazhi në ekran shpjegon se pajisja është bllokuar pasi nuk e kaloi verifikimin gjatë konfigurimit pas një factory reset. Për ta rikthyer në funksion, kërkohet kodi i fundit i përdorur ose kredencialet e llogarisë Google të lidhur.
Google konfirmoi se versioni i ri i Factory Reset Protection do të dalë më vonë këtë vit, ndoshta së bashku me Android 16. Kompania njoftoi gjithashtu se versioni i qëndrueshëm i Android 16 do të prezantohet në qershor dhe do të sjellë gjuhën e re të dizajnit Material 3 Expressive. Sipas një rrjedhjeje të fundit, ndërfaqja e përmirësuar do të fokusohet te ngjyrat, format, përmasat, lëvizja dhe ndarja vizuale për ta bërë më të lehtë përdorimin, sidomos për përdoruesit më të moshuar.
Ky dizajn i ri do të shtrihet në të gjitha aplikacionet e sistemit, përfshirë një version të përmirësuar të aplikacionit Clock, me një shirit të ri poshtë ekranit, një font të ri dhe dizajn të rifreskuar për seksionet e alarmeve dhe kronometrit.
