Që aplikacionet na gjurmojnë aktivitin në web dhe në aplikacionet e tjera kjo tashmë është e ditur. Zakonisht kjo nuk është problem, qëllimi kryesor është të të ofrojnë një eksperiencë sa më të personalizuar bazuar në preferencat e tua.
Por sipas raportimeve këto të dhëna jo gjithmonë përdoren për mirë, teksa një studim i Washington Post i vitit të shkuar deklaron se të paktën 5,400 aplikacione iPhone mblidhin materiale personale si numra telefoni apo vendndodhje të përdoruesit dhe ia dërgonin kompanive të marketingut, pa autorizim.
E në këtë rast kemi të bëjmë me një shkelje përtej etikes.
iOS 14 mesa duket po i dedikon një rëndësi të veçantë proçeseve që të kalojnë nën hundë dhe deri dje as që e kishim idenë se ndodhnin. Përveç detektimit të TikTok-ut teksa kopjonte nga clipboardi i përdoruesve, sistemi i ri operativ do të të lejojë të bllokosh gjurmimet për të cilat folëm më lartë nga njëri aplikacion tek tjetri. Funksion i cili padyshim mirëpritet nga të gjithë, tek e fundit më shumë kontroll, bravo Apple.
E dimë që iOS 14 ende nuk ka mbërritur, por versioni public beta mund të instalohet kurdo, e nëse do të presësh atë zyrtar shtyp atë yllin lart djathtas e ruaje për më vonë këtë artikull.
Për të bllokuar gjurmimet e padëshiruara ndiq hapat:
1. Shko tek Settings
2. Zbrit poshtë dhe zgjidh Privacy
3. Kliko sipër tek Tracking
4. Cilësimi i paracaktuar është që të lejojë aplikacionet të kërkojnë leje për të gjurmuar
5. Fike tek butoni djathtas, për të mos autorizuar as kërkesën për leje.
6. Në raste kur ke lejuar programe të të gjurmojnë do të kesh një listë poshtë Privacy > Tracking.
