Momentalisht Samsung është kompania lider në treg për sa i përket smartphone-ve të palosshëm. Galaxy Z Flip dhe Galaxy Z Fold janë ndër smartphone-t më të shitur në të gjithë botën. Ky treg, sipas ekspertëve, pritet të rritet me 80% deri në vitin 2025.
Përgjatë një takimi të organizuar nga Samsung MX në javën e 3-të të tetorit, ju lajmërua furnizuesve të pjesëve se rritja e këtij segmenti pritet të jetë shumë e madhe deri në 2025, dhe se Apple ka në plan t’i bashkohet hapësirës së pajisjeve të palosshme në vitin 2024, fillimisht me tabletë dhe notebooks dhe jo smartphone.
Në Korenë e Jugut, personat në moshën 20-30 vjeç po ndërrojnë iPhone-in e tyre me një pajisje të palosshme nga Samsung në një shkallë “3 deri në 4 herë më të lartë se më parë”.
Janë disa gjëra që Samsung mendon se duhet të përmirësohen që smartphone-t e palosshëm të bëhen më të përhapur. Fillimisht madhësia e tyre duhet të zogëlohet, e më pas këto pajisje duhet të bëhen më rezistente. Gjithashtu shenja e palosjes në ekran duhet të zvogëlohet.
Megjithatë nuk u harrua të përmendej dhe nevoja për një S Pen të integruar në trupin e pajisjeve të palosshme, pasi shumë konsumatorë e kërkojnë një gjë të tillë. Kompania dëshiron gjithashtu të përmirësojë kamerat duke përdorur të njejtat kamera si në smartphone-t flagship.
