Para disa javësh në internet po qarkullonin raportime të ndryshme se Coca-Cola ishte duke bashkëpunuar me Realme për të prezantuar në treg një version të veçantë smartphone-i “Coca-Cola Edition”.
Tashmë është prezantuar zyrtarisht një bashkëpunim i tillë, ku Realme dhe Coca Cola kanë prezantuar Realme 10 Pro 5G Coca-Cola Edition, me shërbime të dizenjuara veçanërisht për t’iu përshtatur pijes mjaft të konsumuar në mbarë botën.
Në pjesën e pasme të smartphone-it gjendet e printuar logo e Coca-Cola, si dhe unazat e kamerave janë me ngjyrë të kuqe. Ky bashkëpunim vazhdon dhe në ndërfaqjen e përdoruesit gjithashtu, ku në UI përdoren shumë ngjyrat e kuqe si dhe ofrohet një animim i veçantë që shfaqet kur ju karikoni pajisjen tuaj.
Realme shton se ky smartphone luan një melodi të veçantë gjatë telefonatave, ardhjes së njoftimeve të reja, ka disa filtra të reja Coca-Cola në aplikacionin e kameras, si dhe një melodi speciale gjatë ndezjes dhe fikjes së ekranit (ku imitohet zhurma e hapjes dhe e mbylljes së një kanaçeje Coca-Cola).
Duhet theksuar se për sa i përket hardware-it, ky smartphone nuk ka ndryshime nga një Realme 10 Pro 5G normal, pra proçesori i përdorur është një Snapdragon 695, ekrani LCD 120Hz, bateria me kapacitet 5,000mAh dhe kamerat të njejta.
Realme 10 Pro 5G Coca Cola Edition do të dalë në shitje në datën 14 shkurt dhe do të kushtojë $255 me konfigurimin e vetëm 8/128GB.
