Po të kishe nga 100 lekë për secilën herë që yt atë qahet për baterinë e smartphonit të tij, pale sa iPhona do kishe ndërruar.
Kohet e arta kur Nokia 3310 e karikoje vetëm një herë në javë u eklipsuan me ardhjen e ekraneve masiv, me teknologji të avancuar dhe funksione që deri dje të duhej një kompiuter dhe ca pajisje shtesë për ti bërë.
Oukitel ka një alternativë për kushtet më të vështira dhe me një çmim që konkuron çfarëdo ti hedhësh përpara.
Për vetëm $159.99 WP6 sjell opsione të kategorisë së mesme, 4GB RAM dhe 128GB hapësirë, ekran 6.3-inch dhe rezolucion 1080 x 2340 pixel. Kamera 48MP dhe Android 9.0.
Por pikat ku smartphoni nuk njeh konkurencë janë forca, pasi aparati është i super mbrojtur, gati për të duruar rënie dhe goditje nga më dramatiket. 1.1mm Corning Gorilla Glass, dhe një kornizë “aviation metal” .
Mbrojtja nga pluhuri dhe uji është IP68 e cila i lejon të rezistojë deri në 1.5 metra thellësi për 30 minuta.
Dhe zgjidhja përfundimtare e karikimit vjen në formën e 10,000 mAh.
Një bateri masive e cila mund të përdoret edhe për të karikuar edhe aparate të tjerë. 18W duhet të ofrojë shpejtësi të mjaftueshme karikimi.
Nuk është smartphoni më i sofistikuar apo më i bukur, por qartazi dikujt që punon në kushte të vështira do t’i bënte goxha nder.
