OnePlus ka filluar të “luajë” disi me performancën dhe konsumin e energjisë në smartphone-t e saj. Kjo histori ka dy anë, njëra prej tyre tregon se OnePlus po mashtron me vlerat në benchmark, dhe tjetra thotë se po “optimizon performancën”.
Andrei Frumusanu kohët e fundit bëri disa kërkime dhe zbuloi se OnePlus 9 ulte në mënyrë dramatike shpejtësinë e Chrome dhe aplikacioneve të tjera shumë të përdorura. Disa herë, Chrome funksiononte në mënyrë të limituar vetëm nga Cortex-A55 cores, duke lënë pa përdorur pjesën më të madhe të fuqisë kompjuterike të smartphone-it në A78 dhe X1 cores.
Ai tha se gjatë testimeve të benchmarks dhe përdorimit të aplikacioneve jo shumë të njohura, pajisja përdor të gjithë fuqinë e saj për të arritur performancën maksimale, ndërkohë që në aplikacionet e njohura smartphone-i limiton performancën. Kjo gjë me shumë mundësi bëhet për të përmirësuar jetëgjatësinë e baterisë.
Si një kundërpërgjigjje, aplikacioni Geekbench i hoqi pajisjet OnePlus 9 dhe OnePlus 9 Pro nga grafikat e saj, duke thënë: “Ne e vlerësojmë këtë veprim si një manipulim të vlerave përfundimtare”.
Më pas OnePlus u detyrua të japë një përgjigjje mbi këtë fenomen, ku u shpreh: “Prioriteti ynë është ofrimi i një eksperience të shkëlqyeshme për përdoruesit. Pas kërkesës së përdoruesve për rritjen e jetëgjatësisë së baterisë dhe menaxhimit të mbinxehjes, ne vendosëm të punonim për optimizimin e 300 aplikacioneve më të përdorura për të kënaqur përdoruesit.”
Nga testimet e shumë përdoruesve ka rezultuar se navigimi në Chrome është rreth 75-85% më i ngadaltë seç duhet të ishte.
