Pas konfirmimit se LG do të ndalojë prodhimin e smartphone-ve të rinj, kompania ka premtuar mbështetjen e smartphone-ve ekzistues me 3 vite OS updates. Ky është një lajm mjaft i mirë për personat që kanë blerë një telefon LG kohët e fundit.
“LG Electronics do të mbështesë të gjithë smartphone-t premium LG ekzistues me deri në 3 OS updates që nga viti i blerjes. Ky vendim do të aplikohet në telefonat e prezantuar nga 2019 e më vonë (seria G, seria V, VELVET, Wing) ndërkohë që disa modele të 2020 si LG Stylo dhe seria K do të përfitojnë 2 OS updates.” u shpreh kompania në një njoftim të publikuar ditën e enjte.
Këto premtime do të varen nga koha e shpërndarjes nga Google bashkë me faktorë të tjerë si performance dhe pajtueshmëria e këtyre smartphone-ve.
Mirëpo LG do të vazhdojë të prodhojë disa telefona deri në mesin e verës, pasi ka disa kontrata që duhen respektuar. Kjo nënkupton se përdoruesit mund të blejnë produktet që gjenden ende në inventar.
