Ndërkohë që Samsung duket se po tërhiqet nga anët e lakuara të ekraneve, Xiaomi nuk e mban dorën fare dhe shton edhe dy anë të tjera me ekran të lakuar.
Në një video teaser kompania ka treguar një koncept i cili paraqet një smartphone me xhamin dhe ekranin që nuk ndalet nga kornizat tradicionale. Ai shtrihet në të katërta drejtimet dhe lakohet deri në 88% duke e mbëshjellë gjithë perimetrin e trupit të aparatit. Megjithatë ka lënë vend vetëm për cepat të cilët mbeten të ekspozuar.
Për shkak se gjithçka rrethohet nga xhami, nuk ka vend për butona fizik dhe as për porta hyrëse, dhe Xiaomi nuk i ka vënë ato. Në vend të butonit për volumin kompania thotë se mund të përdorë teknologjinë e sensorëve të presionit, me anë të shtrëngimit të tij. E për karikim do të duhet të përdoret wireless. Fiks në kohë me lançimin e një aparati nga Xiaomi i cili pretendon të karikojë smartphonat nga disa metra distancë.
Mbi të gjitha mënyra se si kontenti paraqitet në këtë smartphone duket mjaft tërheqëse, përderisa kanë krijuar hapësira të reja për ekran, pse të mos i shfrytëzojnë. Xiaomi thotë se ky koncept është produkt i 46 patentave të reja, ndaj presim inovacion. Për të na garantuar që ky nuk është vetëm një render Xiaomi PR thotë se ka të paktën disa prototipe funksionale në gjendje, ndaj mesa duket të reja do të kemi në vazhdim.
