Erdhi pra, iPhone 12 më në fund mbërriti dhe opinionet janë të përzjera. Pjesa më e madhe e parashikimeve rezultoi e saktë, 4 modele, një mini, një standart, versioni Pro dhe Pro Max. Proçesor i ri, 5G dhe sensori LiDAR.
Eventi fillimisht u hap nga Tim Cook i cili prezantoi një HomePod Mini, të përballueshëm nga të gjithë e më pas përfaqësues të departamenteve të ndryshëm na prezantuan katër modelet e reja e specifikat e tyre.
Së pari u prezantua iPhone 12, 6.1″ 11% më i hollë, 15% më i vogël dhe 16% më i lehtë. Dhe kënde të sheshta, dallues të kësaj gjenerate. Ekranet OLED janë uniformë tek të katërt e për më tepër do të mbrohet nga një shtresë e veçantë qeramike për të garantuar 4 herë më shumë durabilitet.
Ashtu si gjithë të tjerët do të vijë me proçesorin më të fundit A14 Bionic dhe i vetmi smartphone me teknologji proçesimi 5nm. Kjo garanton fuqi më të madhe por edhe efikasitet në konsumin e energjisë. Sipas Apple ky proçesor është 50% më i shpejtë se gjithë konkurenca.
Më pas radha i takoi iPhone 12 Mini i cili për fat ka pothuajse të njëjtën fuqi por vjen në dimensione më modeste me një ekran 5.4″.
Vjen i pajisur me 5G dhe ka të njëjtat specifika për kamerën me versionin standart. Seti i dyfishtë i të cilave ka marrë më shumë investim në anën softuerike.
Çmimet për Mini do të fillojnë nga $699 ndërsa për iPhone 12 fillojnë nga $799.
Diferenca sigurisht mban prapashtesën Pro i cili nga Pro Max ndryshon vetëm në dimensione. Pro do të ketë një ekran 6.1″ ndërsa Pro Max 6.7″.
A14 Bionic edhe këtu është 5nm por në ndryshim nga dy të parët ka aftësi shtesë për proçesimin në kohë reale të asaj çka kamera fotografon apo xhiron, aseti i cili do të të kushtojë ca qindra dollarë më tepër.
Tre sensorët e kamerave të pasme kanë pësuar ndryshime kryesisht në aperturë për të punuar më mirë me dritën e ulët. Ndryshe nga ç’pritej Pro dhe Pro Max nuk do të kenë katër lente, pasi sensori për matjen e thellësisë LiDAR është më i vogël dhe nuk bie aq shumë në sy. Ai do të shtojë goxha avantazhe në proçesimin e dritës, si dhe sa shpejt ajo i godet objektet. Ky sensor do të kontribuojë goxha në planet që kompania ka për sektorin AR.
Pandemia mesa duket ka ndikuar edhe tek Apple e cila kësaj radhe ka vendosur që iPhone 12 Pro të fillojë ta ofrojë nga $999 ndërsa 12 Pro Max nga $1099.
Kryefjalë e eventit ishte padyshim edhe infrastruktura 5G, e cila ndodhet në të katër produktet. Por do të duhet të presim pak kohë sa të kuptojmë cili smartphonë ka sub-6, cili atë më të shpejtë 5mmWave dhe cili të dyja bashkë.
Geek Room e ndoqi eventin në një live në Instagram. Për komentet dhe përshtypjet tona të para ndiq videon më poshtë, dhe na jep edhe ti mendimin tënd.
