Pas konfirmimit gjatë MWC 2022 (ku Geek Room dhe Neptun ishin të pranishëm) të shkrirjes së kompanive OnePlus dhe Oppo, pritet që dhe sistemet operative të tyre të unifikohen në një të vetëm. Me shumë mundësi ky unifikim mes OxygenOS dhe ColorOS do të vijë në versionin e ri të Android 13, siç tregon në raportimin e saj MySmartPrice.
Ky raportim qëndron në të njejtin drejtim me zërat e fundit që spekulojnë se OnePlus 10 Pro do të lançohet globalisht pa një sistem operativ të unifikuar, pra do të vazhdojë të përdorë OxygenOS. Nëse kjo gjë është e vërtetë, atëherë pritet që dhe pajisjet si OnePlus Nord CE 2 dhe seria Find X5 e Oppo të vijnë me sistemin operativ ekzistues.
Ky OS i unifikuar nuk duhet të ngatërrohet me gjendjen aktuale të Oxygen OS. Në OnePlus Nord 2, OxygenOS është krijuar teknikisht mbi ColorOS, por ofron një eksperiencë të ndryshme në elementë të caktuar. Kur OS i unifikuar të vijë, do të jetë i njejtë në të gjitha pajisjet Oppo dhe OnePlus. Deri më tani nuk janë bërë të ditura shërbimet apo dizajni që do të përfshihen në to.
Duke ditur se Android 13 do të vijë gjatë gjysmës së dytë të 2022, do të na duhet të presim disa muaj deri sat ë shikojmë zhvillime të reja.
Për sa i përket emërtimit të OS të ri, disa raportime tregojnë se po vlerësohet emri “H2OOS”.
