Pas Developer Preview të Android 11 tashmë e dimë pak a shumë çfarë të presim konkretisht nga versioni më i ri i sistemit operativ.
Nuk këshillohet akoma që ta instalosh në smartphone pasi është akoma shumë i paqëndrueshëm. Megjithatë nuk bën keq të mësosh se cilat do të jenë risitë që do të shijojmë pasi update-i të vijë zyrtarisht.
– Regjistrues i ekranit
Google ka kohë që luan me këtë funksion dhe një ikonë është tashmë prezente tek dritarja Quick Settings. Kësaj radhe presim një version të finalizuar dhe me opsione edhe më specifike.
– Flluskat e Chat-it
Pak a shumë si Messenger, rrathët e bisedës me një kontakt tjetër të cilat pluskojnë nëpër ekran mbi çdo aplikacion do të jenë të disponueshme për të gjitha programet e chatimit. Telegram dhe WhatsApp punojnë më së miri me të.
– Menuja e shpërndarjes
Dritarja e shpërndarjes do të të lejojë që të zgjedhësh 4 aplikacionet e preferuara. Ndaj kur të duash të shpërndash diçka nuk do të kesh pse të humbësh kohë me aplikacione të tjera. Gjithashtu edhe kontaktet më të frekuentuara.
– Ndalo notifications gjatë regjistrimit
Kur je duke bërë një foto apo video, tingulli apo dridhja e një mesazhi mund të jetë e besdisshme. Android 11 do të lejojë që t’i kufizosh të dyja.
– Airplane Mode nuk e fik më Bluetooth-in
Deri tek Android 10 modaliteti Airplane fikte edhe Bluetooth, tek 11 ky nuk do do të jetë më problem. Mund të përdoret pa kufizime edhe kur valët janë mbyllur.
– Historia e njoftimeve
Android nuk të lejon të shohësh njoftimet pasi t’i kesh hequr njëherë. Sistemi i ri do të të lejojë t’i shohësh të gjitha në opsionin e ri të historikut të notification.
– Heqja e lejeve për aplikacionet e papërdorura
Tek seksioni “App Permissions” i secilit aplikacion do të gjendet një funksion i ri, i cili do t’i mohojë të gjitha lejet e dhëna për akses atij aplikacioni. Nëse një aplikacion ka marrë autorizimin tënd për vendndodhjen, fotot apo të dhëna të tjera, nëse ke kohë që nuk po e përdor mund t’ia ri-mohosh këtë të drejtë.
– Leje për vetëm një herë
Android 10 lejon aplikacionet që të marrin të dhënat e vendndodhjes tënde, mikrofonit, apo kamerës vetëm kur janë të hapura. Tani me Android 11 do të kesh mundësinë t’ua japësh lejen vetëm një herë e më pas sistemi do t’ua heqë të drejtën.
– Raporte rifreskimi të ndryshueshëm
Ekranet me refresh rate të lartë duket se janë trendi i momentit. Android 11 do të të lejojë të përcaktosh shpejtësinë e preferuar për secilën dritare, lojë apo program sipas dëshirës. Gjithmonë nëse aparati vetë e suporton teknologjinë.
– Suport për ekranet e lakuara
Këto të fundit janë trend ndër aparatet Android, zhvilluesit tashmë do të kenë mundësi t’i menaxhojnë më mirë këto hapësira duke i përcaktuar si zona interaktive.
– Teknologjia e re
Android 11 do të jetë e përshtatshme më mirë me teknologjitë e aparateve që palosen dhe 5G. Gjithashtu do të përfshijë dekodim video të latencës së ulët për shërbime gaming si Google Stadia.
– Dritaret brenda dritareve
Multitasking ka qenë gjithmonë prioritet dhe veçori e Android dhe kësaj radhe dritarja e vogël do të mund të zmadhohet a zvogëlohet më lehtë. Njejtë si në PC mjafton të kapësh njërin nga 4 cepat e dritares dhe ripërcakto.
Tashmë jemi futur në fazën e dytë të lançimit e cila do të finalizohet në muajin gusht ku do të nisi edhe përditësimi zyrtar i Android 11.
