Bateritë e zakonshme të smartphoneve humbasin deri në 20% të kapacitetit origjinal përgjatë një viti përdorim. Gjenerata e baterive të përdorura nga Samsung në Galaxy S8 humbet vetëm 5% të kapacitetit origjinal pas përdorimit për një vit, mirëpo dhe kjo nuk është e mjaftueshme nëse ne do të përdorim një smartphone për 2-3 vite.
Një ekip shkencëtarësh në Japan Advanced Institute of Science and Technology ka zbuluar një material të ri që ndihmon bateritë të ruajnë 95% të kapacitetit original për 5 vite. Terminalet negative te baterive aktuale përdorin një material lidhës të quajtur PVDF dhe performanca e tij nuk është e mire. Pas 500 rikarikimesh, këto bateri humbasin rreth 35% të kapacitetit fillestar.
Materiali i ri i lidhës i zbuluar quhet Bis-imino-acenaphthenequinone-Paraphenylene (BP) i cili bën të mundur ruajtjen e 95% të kapacitetit fillestar pas më tepër se 1,700 rikarikimesh, që përkthehet në pak a shumë 5 vite përdorim të përditshëm. Kjo teknologji nuk do të ndihmojë vetëm smartphone-t, tabletet dhe laptopët, por edhe bateritë e makinave elektrike. Në këtë mënyrë karikimi mjaft i shpejtë i tyre nuk do të pengohet më nga fakti i degradimit të baterisë.
Ne shpresojmë që Samsung të fillojë të implementojë këtë teknologji në pajisjet e reja, duke i dhënë fund një herë e mirë baterive me performancë të ulët.
