Pavarsisht problemeve me Google dhe luftrat e industrisë, Huawei është absolutisht ndër alternativat më solide dhe më të fuqishme që mund të zgjedhësh jashtë binomit Apple, Samsung.
Jo vetëm në software dhe hardware por edhe në design, vetëm pak ditë më parë The Verge e quajti P30 si një kryevepër estetike me detajin kryesor gungen e 4 sensorëve të kamerës. Dhe pikërisht këtu do të ndalemi, pasi Huawei paska plane për të, goxha plane.
Sipas një patente të regjistruar tek World Intellectual Property Office, diku nga mesi i 2019, rrethi i kamerës së Huawei Mate P50, apo sido që do të quhet gjenerata e ardhshme, do të ketë një ekran i cili do të ketë disa funksione vërtetë të dobishme.
Sipas patentës unaza që do të rrethojë kamerën, do të jetë një ekran funksional me prekje i cili do të kryejë shërbime si kontrolli i volumit, zoom in apo out, kalimin nga njëra foto apo faqe tek tjetra dhe shumë funksione të tjera.
Ndërkaq nëse smartphoni është me ekran poshtë do të tregojë se kush po telefonon, ose edhe mesazhin që sapo erdhi. Në fund të fundit është një ekran, ndaj dhe mundësitë janë të pafundme.
Por sidoqoftë, kompanitë patentojnë ide gjithë kohës dhe jo gjithmonë ndodh ti konkretizojnë.
Nëse ndodh do të duhet të presim për gjeneratën tjetër sepse Huawei P40 ka premierën nesër, dhe askund nuk duket ndonjë ekran unazë në horizont.
