Huawei lajmëroi sot një version të dytë të sistemit të vetë operativ HarmonyOS i cili do të zgjerojë shtrirjen në paisje të tjera teknologjike. Lajmi konfirmohet nga CEO Richard Yu gjatë konferencës për zhvilluesit në Shenzen, Kinë.
Versioni beta i HarmonyOS 2.0 SDK do të jetë i disponueshëm nga sot në paisjet smartwatch, njësi makinash dhe televizorë. Versioni për smartphone do të vijë këtë dhjetor.
Për më tepër, Huawei konfirmoi se do të sjellë projektin OpenHarmony i cili lejon zhvilluesit të ndërtojnë aplikacione mbi një version open source, njejtë si Android. Për momentin sistemi funksionon vetëm për aparate me 128MB RAM dhe më poshtë, por do të zgjerohet në 4GB në muajin prill dhe limiti do të hiqet komplet në tetor 2021.
Gjatë konferencës, Huawei prezantoi gjithashtu produktet e reja si: Huawei Watch Fit, Huawei FreeBuds Pro, Huawei Watch GT 2 Pro, MateBook X dhe MateBook 14, si dhe Huawei FreeLace Pro.
Kjo mesa duket është përgjigja e Huawei ndaj sanksioneve të vendosura nga qeveria amerikane e cila ndalon kompanitë e veta të bëjnë biznes me kompaninë kineze.
Tek e fundit, një kompani e tillë është ndër të vetmet që mund t’i bëjë opozitë gjigandëve si Google dhe Apple. Dhe deri tani duket se rruga është e mbarë.
