Po Apple, okay, po i blejmë AirPodsat dhe po e heqim qafe njëherë e mirë kabullin, por lehtësinë e “jackut” të kufjeve dhe kalimin e tij nga njëri apart në tjetrin me një të hequr e një të vënë çfarë na e zëvendëson?
WWDC na jep më në fund përgjigje duke prezantuar kalimin automatik nga njëra pajisje tek tjetra. AirPods, Powerbeats, Powerbeats Pro dhe Beats Solo Pro do të munden të ndërrojnë burimin e audios nga iPhone tek video që po luan në laptop. Nga filmi në kompiuter tek iPhone nëse dikush po të telefonon.
Ka vetëm një detaj të vogël; iCloud, pajisjet duhet të jenë të lidhura me të njëjtin identitet, pajisje të panjohura do të duhet të kalojnë proçesin e çiftimit nga fillimi, kështuqë teknologjia analoge ende mbetet e pamposhtur.
Por prit se ka akoma, mban mend atë efektin ekzotik të materialeve 8D, Apple mendon ta sjellë si teknikë bazë të AirPodsave.
“Spatial Audio” do të të ofrojë efekte multi dimensionale, duke kopjuar eksperiencën e një kinemaje ose sistemit “sorround“. Në varësi të pozicionit të kokës burimet do të ndryshojnë për të dhënë veç volumit dhe qartësisë edhe pozicionin apo distancën.
Një version i ndarjes së audios do të jetë prezent gjithashtu, dy përdorues do të mund të përdorin të njëjtët aparate Apple TV njëkohësisht.
Se kur do të vijnë këto përditësime të reja, ende nuk është e ditur.
