Nëse seria e parë e një Razr smartphone shfrytëzonte nostalgjinë, pasardhësi i tij ka sfida dhe pritshmëri për të përmbushur.
Një produkt i tillë pritet të vijë në 2020 jo vetëm sepse kompania e ka konfirmuar por edhe sepse kemi fotot e para “në dorë” të aparatit. Fotot u postuan nga një përdores kinez në Weibo dhe më pas u fshinë por dikush u tregua mjaft i shkathët sa ti bënte një nder botës së entuziastëve të teknologjisë.
Produkti në foto mund të mos jetë përfundimtari, pavarsisht se paraqitet në gjendje pune, kompania duhet të jetë në fazë prototipesh dhe derisa të dalë nuk mund të jemi plotësisht të sigurt.
Imazhet e rrjedhura tregojnë ndryshime sa i përket mjekrës e cila duket më e vogël dhe sensori nuk është më aty. Trupi ka më pak kënde duke u bërë më i lakuar në pjesët e jashtme.
Mekanizmi i menteshës këtu është shumë më i dukshëm, shumë jo 2020, kjo përforcon dyshimet për prototip.
Kur mbyllet, flashi dhe kamera kanë lëvizur më poshtë për ti hapur rrugë një mini-ekrani më të madh.
Megjithatë ajo që na intereson të dimë nga një smartphone i palosshëm është cilësia e ekranit, në rezolucion por edhe në durabilitet, por kjo është diçka të cilën nuk mund ta dallosh nga fotot.
Do të na duhet të presim deri në fund të vitit kur sipas parashikimeve mund të shohim një produkt të finalizuar.
