Që Apple bën goxha para prej aksesorëve të iPhone kjo është e ditur. Mungesa e një jack kufjesh dhe USB-C universale, përforcon nevojën për të blerë aksesorë specifik që të mbajnë brenda ekosistemit të kompanisë. Një lëvizje e zgjuar me lançimin e iPhone 12 mban emrin MagSafe.
Ajo është një infrastrukturë e re e ndërtimit të pjesës së pasme të një smartphoni, paneli i karikimit wireless do të ketë edhe disa magnete të vegjël rreth e rrotull për të mbajtur ngjitur pas vetes aksesorë të rinj, nga padët e karikimit të cilët tashmë do të qëndrojnë të fiksuar në smartphone, xhepa për të mbajtur kartat por edhe krijime të reja që priten të vijnë së shpejti.
Që në lançimin e iPhone 12 pamë disa produkte, veç xhepit të kartave, u prezantua edhe një pod dual, i cili mund të karikojë smartphonin por edhe një orë apo kasë kufjesh. Edhe vetë Belkin është duke punuar për produkte të tilla.
MagSafe nuk është vetëm një palë magnete, sistemi është i pajisur edhe me NFC, opsion i cili do të lejojë komunikimin e aparatit vetë me aksesorët të cilët mund të jenë edhe smart. Kështu smartphone do të kuptojë çfarë është ai sistem dhe ç’duhet të bëjë me të, si për shembull kasa sleeve e cilë ka një hapsirë të veçantë për orën. Kur iPhone të jetë brenda saj do të ndezë automatikisht orën në ekran.
Nga ana tjetër Apple ka përmirësuar edhe vetë karikimin i cili tashmë është dyfishuar në 15W. Ndoshta jo më e shpejta në botë por është përparim sidoqoftë ,duke marrë parasysh se karikimi wireless nuk është ende aq i shpejtë sa ai me kabull.
