Oppo Find N2 Flip mund të gjendet lehtësisht në shitje në tregun e Kinës, mirëpo klientët në tregjet e tjera ende nuk kanë patur mundësinë të blejnë një pajisje të tillë. Nuk ka ende informacione zyrtare në lidhje me atë që do të ndodhë, mirëpo një leak i ri ka zbuluar çmimin e kësaj pajisje që pritet të prezantohet së shpejti në tregun ndërkombëtar.
Raportimi nga Appuals tregon se Oppo Find N2 Flip do të dalë në shitje në tregun evropian për €1,100 – €1,200, dhe pse data e prezantimit ende nuk është e qartë. Mendohet se kjo pajisje mund të prezantohet gjatë Mobile World Congress në Barcleonë, që do të organizohet gjatë datave 27 shkurt deri në 2 mars.
Oppo Find N2 Flip është pajisja me të cilën Oppo po tenton të rivalizojë Samsung Galaxy Z Flip 4. Kjo pajisje do të vijë në 2 ngjyra Astral Black dhe Moonlit Purple, si dhe me 1 version të vetëm për memorien: 256GB internal storage dhe 8GB RAM.
Pjesa tjetër e specifikave do të jetë e ngjashme me smartphone-in e prezantuar në Kinë. Find N2 Flip do të ketë një ekran 6.8” AMOLED dhe 120Hz refresh rate. Ekrani i jashtëm do të ketë madhësi 3.26” dhe do të ketë rezolucion HD+.
Pajisja do të fuqizohet nga proçesori MediaTek Dimensity 9000+, si dhe do të ketë kapacitet baterie 4,300mAh.
