iPad i palosshëm nga Apple, një produkt i pritur prej kohësh nga fansat e produkteve të kompanisë, është tani në “zhvillim intensiv” dhe mund të prezantohet në fund të vitit 2024, sipas DigiTimes.
DigiTimes përshkruan se si Apple tani po punon me furnitorët për zhvillimin e iPad-it të palosshëm, përpara prodhimit në shkallë të vogël të planifikuar për në fund të vitit 2024.
Ky raport thekson se kjo gjë tregon se Apple mund të prezantojë pajisjen në fund të 2024 ose në fillim të 2025 nëse progresi mbetet i qëndrueshëm. Apple me sa duket po punon për produktet e palosshme prej katër vitesh dhe vazhdimisht ka bërë ndryshime të dizajnit në këtë kohë, duke planifikuar të prezantojë fillimisht një iPad të palosshëm përpara se të krijojë një iPhone të palosshëm.
Apple zgjodhi të përqëndrohet në iPad, sepse ai përbën një pjesë relativisht të vogël të shitjeve të kompanisë, që do të thotë se problematikat e mundshme janë më të lehta për t’u menaxhuar dhe me më pak ndikim. Kompania thuhet se nuk e ka finalizuar ende dizajnin e iPad-it të palosshëm.
Fillimisht, ishte ekipi i dizajnit të produkteve të Apple që e drejtoi projektin, por ky rol tani thuhet se është zhvendosur në departamentin e prokurimit për të ulur kostot.
Një problem kryesor thuhet të jetë paneli dhe menteshat e pajisjes, ku Apple është veçanërisht i shqetësuar për rrudhat e ekranit. Kompania me sa duket po kërkon nga Samsung dhe LG që të ofrojnë një ekran që zbut efektin e rrudhosjes duke përdorur teknika të reja të palosjes.
Prodhimi masiv i pajisjes së parë të palosshme të Apple pritet të fillojë në vitin 2025.
