Edhe pse situata e momentit është e vështirë për të gjithë, pasi të dalim nga këtu do të përballemi me vështirësi ekonomike plot.
Kjo duket se nuk i ka ndaluar kompanitë e smartphonave të cilat në këtë moment po punojnë fort për produktet që do të fillojnë të dalin që këtë muaj e gjatë gjithë verës.
Pa u zgjatur shumë ja lista e plotë e smartphonëve që presim të lançohen brenda 2020.
Samsung Galaxy Fold 2
Pavarësisht fatit jo edhe aq të mirë për gjeneratën e parë, Samsung është e vendosur që të jetë e para në një treg i cili pritet të krijohet në vitet në vijim. Pasi i treguan botës se dinë të bëjnë një aparat të lakueshëm me Z Flip, Koreanët provojnë përsëri.
Samsung Galaxy Note 20
E raportuar nga një media lokale, kjo bishë performance pritet të vijë së bashku me Fold 2 gjatë Gushtit dhe mezi presim. Fansat e këtij super mjeti nuk do të zhgënjehen përkundrazi surpriza na presin.
Seria Huawei P40 Pro
Themi seria pasi do të vijnë 3 modele, dhe zemra na rreh për heroin e grupit P40 Pro Plus.
Do të jetë smartphone i parë me 10x optical zoom, avancim në fotot në errësirë dhe një ekran pa korniza. Koha e shitjes synon të fillojë në Qershor.
Xiaomi Mi 10, Mi 10 Pro
Një vend të veçantë e ruajmë për teknologjinë cilësore dhe të përballueshme të Xiaomi. Por këto produkte tregohen më ambicioz se aq. Për çmime që fillojnë nga €799 dhe €999 Xiaomi do të ofrojë Snapdragon 865, ekrane 90Hz, bateri 4500 mAh, dhe një kamera kryesore 108MP.
Seria Samsung Galaxy A
Në total 7 smartphonë që fillojnë nga $110 deri në $600. Nga më i liri deri tek ai më i mesmi Samsung ka nga një alternativë për secilin xhep, me ndryshime që konsistojnë në performancë por edhe në infrastrukturë. Dy të fundit më të shtrenjtit A51 dhe A71 vijnë me 5G.
Google Pixel A4 dhe A4 XL
Vitin e shkuar Google solli 3A dhe 3A XL. Produktet rezultuan sukses për kompaninë ndaj edhe pritet e njëjta gjë kësaj here me një çmim fillestar prej $399 për 4A dhe një më të lartë për atë më premium. Filozofia do të vazhdojë të jetë e njëjta, shërbime Google më përpara dhe më mirë nga të gjithë. Pritet të dalin në Prill ose Maj.
Redmi Note 9S
Në Mars nën-kompania e Xiaomi shfaqi Note 9S si smartphone-n e lirë të radhës. Pasardhësi i Note 8 i cili rezultoi të ishte smartphone Android më i shitur i 2019.
5020 mAh bateri, kamera selfie nën-ekran dhe 4 kamera prapa të gjitha duke filluar nga $215?
Kush e di çfarë shtrigërie po përdorin por duket se po funksionon.
OnePlus 8 dhe 8 Pro
OnePlus shpalli se do ti lançojë smartphonët në 14 Prill në një konferencë online. 8 dhe 8 Pro do të kenë 5G dhe ekrane 120Hz ndaj pritet që kësaj here të kushtojnë pak më shumë.
Apple iPhone SE
Hera e dytë që Apple vendos të sjellë një produkt të përballueshëm dhe pritet të vijë në Prill. Me një miks teknologjish nga paraardhësit e tij SE do ngjajë me iPhone 8 dhe mund të kushtojë $399.
Apple iPhone 12
Sipas zhurmave super produkti i Apple do të ketë deri në 4 versione të pa emëruara akoma. Disa do të kenë 5G disa jo. Flitet për ndryshime radikale por ka fjalë të tjera që parashikojnë design të njëjtë me linjën 11.
Një tjetër thashethem flet për vështirësitë me të cilat Apple do të përballet për shkak të mbylljes së fabrikave në Kinë. Megjithatë ngelet për tu parë në Shtator.
Sony Xperia 1 ii
Sony vazhdon të mbetet një OG në industri dhe nuk rresht së sjelli alternativat e saja. Xperia 1ii dhe Pro u shpallën të dyja në Shkurt, dhe duket se do të bartin goxha fuqi, ekrane 4K HDR OLED, Snapdragon 865, 4000 mAh bateri, 8 GB/256GB memorie.
Inovacione priten edhe në software të kamerës.
Sony Xperia Pro
Vëllai i madh Pro do të sulet drejt videoprodhuesëve serioz, përveç të gjitha specifikave të 1ii do të ketë 512GB memorie dhe një portë HDMI/USB 3.1 për video output. Po HDMI në një celular! Do të bazohet tek filozofia Alpha e kamerave të tyre dhe do të sjellë pafund opsione për video proçesim në një tentativë serioze për të hedhur iPhone nga froni i kameramanëve.
Të dy pritet të dalin në dritë në fund të verës.
