Bandai Namco, krijuesi i Elden Ring, ka zbuluar shumë statistika të reja nga të dhënat e grumbulluara brenda lojës, duke përfshirë këtu dhe se cilët janë 5 bosët më të vështirë për t’u mundur në lojë.
Elden Ring u publikua një vit më parë, dhe menjëherë u shndërrua në një ndër lojrat më të pëlqyera nga fansat. Kombinimi i eksplorimit në botën e hapur me një shkallë vështirësie shumë të gjërë ka treguar seështë formula fituese që përdoret vazhdimisht nga studiot japoneze. Që nga publikimi në shkurt të vitit të kaluar, Elden Ring ka shitur më tepër se 20 milionë kopje.
Për të festuar këtë arritje, Bandai Namco njoftoi të gjithë fansat për statistikat në lojë dhe bosët më të vështirë për t’u mundur në bazë numrit total të tentativave për të luftuar me to.
Sigurisht lista kryesohet nga bosi mjaft i njohur Malenia, me të cilin është tentuar dyluftimi 329 milionë herë. Më pas Malenia ndiqet në listë nga bosët e tjerë që shfaqen më herët në lojë, Margit dhe Tree Sentinel, me 281 milionë dhe 277 milionë tentativa për t’i mundur respektivisht.
Lista përmbyllet me dy bosë të tjerë Radagon dhe Starscourge Radahn, të cilët kanë një numër shumë më të ulët dyluftimesh: 148 milionë dhe 139 milionë.
Nga të dhënat e publikuara nga Bandai Namco, mund të shikojmë se në lojë janë tentuar 5.9 miliardë dyluftime me bosët, me një mesatare afërsisht 300 dyluftime për secilin lojtar.
Një tjetër faktor që tregon për vështirësinë e lojës është dhe numri total i vdekjeve: 9 miliardë herë, mesatarisht rreth 450 herë për çdo lojtar.
