SonixLegend, një përdorues nga Shangai, ka arritur një rekord unik në platformën Steam duke u bërë personi i parë që zotëron 40,000 lojëra me pagesë. Sipas të dhënave të Steam, ky sukses e vendos atë në krye të një grupi prej vetëm 19 përdoruesish që zotërojnë mbi 30,000 lojëra. Vlera e llogarisë së tij, sipas SteamDB, vlerësohet nga rreth $248 mijë deri në $642 mijë, në varësi të çmimeve aktuale dhe historike të lojërave.
Megjithatë, ky numër nuk përfshin të gjitha lojërat e mundshme. Shumë tituj “shovelware” – lojëra që nuk kanë arritur një nivel të gjerë angazhimi – dhe lojërat “free-to-play” nuk numërohen, që do të thotë se koleksioni i tij real mund të jetë edhe më i madh. Aktualisht, SonixLegend ka në pronësi shumicën e rreth 45,000 lojërave me profil të plotë që ndodhen në SteamDB, dhe me mijëra lojëra të reja që publikohen çdo vit, një distinktiv për 50,000 lojëra mund të bëhet i arritshëm në të ardhmen e afërt.
Sa i përket kohës reale të shpenzuar duke luajtur lojra nuk mund të tregojmë një informacion të saktë, pasi llogaria është private dhe nuk tregon orët e lojës. Nga të dhënat publike dihet se SonixLegend ka fituar të paktën një arritje në vetëm 261 lojëra dhe ka shkruar komente për 16 prej tyre. Një analizë nga HowLongToBeat tregon se për të përfunduar 2,500 lojërat kryesore në këtë koleksion do të duheshin mbi 2,463 ditë lojë pa ndërprerje, pra gati shtatë vjet.
Ironikisht, loja e tij e preferuar nuk llogaritet në këtë rekord. Profili i tregon 551 orë në “Alien Swarm”, një lojë falas e vitit 2010 nga Valve, duke dëshmuar se pavarësisht koleksionit gjigant, ai vazhdon t’i rikthehet një titulli të vjetër që nuk ka kushtuar asgjë.
